ФутболымкIэ республикэм ичемпионат Мыекъуапэ щырагъэжьагъ. ЗэхэщакIохэм къызэраIуагъэмкIэ, командэ пэпчъ нэбгыри 8 хэт. ШIухьафтын шъхьаIэр футболымкIэ Урысыем ичемпионат ухэлэжьэным ифитыныгъэ къыдэпхыныр ары. Мыр шэкIогъум и 1-м къыщегъэжьагъэу и 7-м нэс Шъачэ щырагъэкIокIыщт.
Республикэ чемпионатым кIэщакIо фэхъугъэх Адыгеим футболымкIэ ифедерациерэ АР-м физическэ культурэмкIэ ыкIи спортымкIэ и Комитетрэ. Зэнэкъокъум команди 8 хэлажьэ, ахэр купитIоу гощыгъэх.
Купэу «А-м» хэфагъэх:«Арго» (Гавердовскэр), «Зихи» (Кощхьабл), «Факел» (Мыекъуапэ), «Спарта» (Мыекъуапэ).Купэу «Б-м» хэтых:«МФОК-у Ошъутен» (Мыекъуапэ), «Алиро» (Мыекъопэ район), «Кавказ-Адэмый» (Красногвардейскэ район), «Креатив» (Мыекъуапэ).ЕшIэгъухэр тыгъуасэ пчыхьэм сыхьатыр 8-м стадионэу «Юностым» щырагъэжьагъэх.Мы тхьамафэм командэхэм зэIукIэгъоу яIэщтхэр:«Арго» — «Спарта», «Зихи» — «Факел» (тыгъуасэ ешIагъэх); «МФОК-у «Ошъутен» — «Креатив», «Алиро» — «Кавказ-Адэмый» (Iоныгъом и 30-м); «Арго» — «Факел», «Спарта» — «Зихи» (чъэпыогъум и 1-м); «МФОК-у «Ошъутен» — «Кавказ-Адэмый», «Креатив» — «Алиро» (чъэпыогъум и 2-м).Стадионым кIон зымылъэкIыщтхэм апае Адыгеим футболымкIэ ифедерацие социальнэ хъытыоу «ВКонтакте» зыфиIорэм щыриIэ официальнэ нэкIубгъом онлайн шIыкIэм тетэу къэгъэлъэгъонхэр къыщитыщтых.