Нэбгырэ 37-рэ хэлажьэ

Урысые обществэу «ШIэны­гъэм» ипроектэу «ШIэныгъэр. ШIухьафтыныр» зыфиIорэм хэлэжьэщтхэр зыщагъэунэфырэм ияхэнэрэ едзыгъо зэфэхьысыжьхэр фашIыгъ. Комиссием тхылъ мин 14-м ехъу къыIу­кIагъ. Адыгеим щыщэу зэнэкъо­къум нэбгырэ 37-рэ хэлажьэ.

Республикэм щыщхэм анахьыбэу къыхахыгъэ лъэныкъохэр: «Гъэсэныгъэ организациемэ просветительскэ Iоф­шIэныр зэращагъэцакIэрэм пае», «Егъэ­джэным ыкIи гъэсэн IофшIэным яIахь зэрэхэлъым пае», «Урысыем щыпсэурэ лъэпкъхэм языкIыныгъэ къэухъумэгъэным яIахь зэрэхэлъым пае» зыфи­Iохэрэр.Къыхэдгъэщын, лъэныкъоу «Наукэм ыкIи технологием» яIахь зэрэхашIыхьэрэм пае» зыфиIорэм Адыгэ Республикэр къыщызыгъэлъагъорэр Адыгэ къэралыгъо университетым ипроектэу «Нау­кэр тыдэкIи щыI. УшэтыныкIэу къэдгъотырэмэ ахэтэгъахъо» зыцIэр ары. ЕдзыгъуакIэм проектым шапхъэу пылъым зыщиушъомбгъугъ: наукэм ифес­тивальхэу урысые кIэлэцIыкIу гупчэхэу «Орлёнкэм» ыкIи «Сменэм» Мыекъуапэрэ Усть-Лабинскэрэ ащызэхащэхэрэ урам фестивальхэр къахэхъуагъэх, джащ фэдэу шIэныгъэлэжь ныбжьыкIэмрэ РАН-м иакадемикрэ язэдэгущыIэгъу, унэгъо хьисап олимпиадэу «А-м къыще­гъэжьагъэу Я-м нэс» зыфиIоу командэ 700-м ехъу хэгъэгум къыщызыугъоигъэр ыкIи Николай Лобачевскэм фэгъэхьыгъэ викторинэу «Урысыем егъэцакIэ» зыцIэр. Къыхэгъэщыгъэн фае, зэфэхьысыжьэу ыужырэм фэхъугъэмкIэ «Лобачевскэр ыкIи ащ иуахът» зыцIэ тхылъыр къыдагъэкIыгъ. Очнэ шIыкIэм тетэу проектым нэбгырэ мин 45-рэ зэлъиубытыгъ, онлайн амалыр зыгъэфедагъэхэр хэбгъэ­хъожьхэмэ, ащ хэлажьэрэр миллиони 5-м нэсыгъ.«Урысыем щыпсэурэ лъэпкъхэм языкIыныгъэ къэухъумэгъэным яIахь зэрэ­хэлъым пае» зыфиIорэ лъэныкъом зыкъыщигъэлъэгъуагъ ВГТРК-м икъута­мэу «ГТРК «Адыгея»» зыфиIорэм ипащэу Ацумыжъ Адам. Ащ документальнэ фильмэу «Культурэм иухъумакIохэр» кинопоэзие жанрэм илъэу ыгъэхьазырыгъ, этнографиемрэ нэрылъэгъу искусствэмрэ зэрипхыгъэх ыкIи проектыр адыгэмэ якультурнэ кIэн фигъэхьыгъ. Фильмым ипремьерэ телеканалэу «Урысые 1-м» къыщагъэлъэгъуагъ, ар тыркубзэм, арапыбзэм ыкIи инджылызыбзэм аралъхьагъ, джащ фэдэу Урысыем, Тыркуем, Марокко щарагъэп­лъыгъэх. Адыгеим и Лъэпкъ музей илъэси 100 зэрэхъурэм къыдыхэлъы­тагъэу а Iофтхьабзэхэр агъэцэкIэгъагъэх. 2025-рэ илъэсым Ацумыжъ Адам дунэе проектэу «БРИКС-м икIэлэ­егъэ­джэ­шхохэр» зыфиIорэм икомандэхэу Сан-Паулу ыкIи Рио-де-Жанейро ащыкIуагъэхэм ахэтыгъ. Ежь ипроектхэу хэушъхьафыкIыгъэ дзэ операцием илIыхъужъхэм афэгъэхьыгъэу Адыгэ телевидением пае ыгъэхьазырыгъагъэр республикэм и ЛIышъхьэ ипремиекIэ къыхагъэщыгъ.«Апэрэ едзыгъом къыщыублагъэу лъэIу тхылъ мин 80-м ехъу Урысыем ишъолъырхэм къарыкIыгъ, IэкIыб къэралыгъохэм — 79-рэ, Иорданием къыщегъэжьагъэу США-м нэсыжьэу къэралыгъуабэ а Iофтхьабзэм къыхэлажьэ. Джырэ уахътэм тиэкспертмэ гъэсэныгъэмкIэ илъэсым ипроект анахь дэгъу­хэр къыхахых, тэри зэфэхьысыжьхэм тяжэ», — къыIотагъ Урысые обществэу «ШIэныгъэм» игенеральнэ пащэу Максим Древаль.ТекIоныгъэм фэбэнэщтхэм онлайн егъэджэнхэр акIущтых, нэужым осэшIмэ апашъхьэ япроектхэр къыщаухъумэщтых.Лауреат хъухэрэр 2027-рэ илъэсым мэфэкI зэхахьэу щыIэщтым къыщаIощтых.