БзэджашIэхэм цIыфхэм яахъщэ ашIуатыгъуным, гъэпцIагъэкIэ къарагъэштэным фэшI «социальнэ хъытыум» нэкIубгъо нэпцIхэр нахь чанэу щагъэфедэ хъугъэ.
Ащ фэдэ шIыкIэм тетэу къагъэпцIагъ илъэс 76-рэ зыныбжь бзылъфыгъэу Мыекъуапэ щыпсэурэр. Тхьаусыхэ тхылъыр Урысыем хэгъэгу кIоцI IофхэмкIэ и Министерствэ къалэу МыекъуапэкIэ иотдел идежурнэ часть къырихьылIагъ. Ащ къызэриIуагъэмкIэ, хъор-шэрыгъэкIэ ащ сомэ мин 25-рэ фэдиз чIырагъэнагъ.Полицием иIофышIэхэм зэрагъэунэфыгъэмкIэ, пенсионер бзылъфыгъэм «социальнэ хъытыум» шъоу щащэу ылъэгъугъэти, банкэ заулэ къыщэфынэу сомэ мини 5 ыгъэхьыгъ.Мэфэ зытIущ тешIагъэу ахъщэ пхъэдзэу зэхащагъэм хэлэжьэнэу ар рагъэблэгъагъ. Бзылъфыгъэр ащ къезэгъыгъ. Нэужым шIухьафтыныр къырихыгъэу, ау ар къыфагъэхьыжьыным пае хэбзэIахьэу сомэ мин 20 ыгъэхьын фаеу къыфатхыгъ. ЗэхэщакIохэм шъоу банкэхэмрэ ахъщэмрэ къызэдагъэхьыжьынэу къагъэгугъагъ.ХэбзэIахьэу зыфаIуагъэр ытIупщыгъ, ау шъоури, шIухьафтынри къыфэкIожьыгъэхэп.Урысыем хэгъэгу кIоцI IофхэмкIэ и Министерствэ къалэу МыекъуапэкIэ иотдел УФ-м и Уголовнэ кодекс ия 159-рэ статья ия 2-рэ Iахь диштэу мыщ пае уголовнэ Iоф къызэIуихыгъ.