Лъэпшъыкъо Ф.
Мыщ фэгъэхьыгъэ Iофтхьабзэр Пушкиным и Унэ щыкIуагъ. Лъэпкъым ихъишъэ фэгъэхьыгъэ мэфэкIыр я ХV-у зэхащагъ. Адыгэ Хасэм, АР-м иминистрэхэм я Кабинет ялIыкIохэр, общественностыр, динлэжьхэр, IэпэIасэхэр, ныбжьыкIэхэр зэхахьэм хэлэжьагъэх.
МэфэкIыр зэлъашIэрэ модельерэу СтIашъу Юрэ къызыхъугъэ мафэм тефэу хагъэунэфыкIы. Мы мафэхэм ащ ыныбжь илъэс 95-рэ хъугъэ.АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт зэхахьэр къызэIуихыгъ. АР-м и ЛIышъхьэ ищытхъу тхылъ зыфагъэшъошэгъэ АР-м культурэмкIэ изаслуженнэ IофышIэу, искусствэм ылъэныкъокIэ АР-м и Къэралыгъо шIухьафтын илауреатэу СтIашъу Юрэ ар фэгушIуагъ.
— Шъуашэр лъэпкъ культурэм изы Iахьэу щыт. ТиблэкIыгъэ уасэ фэтэшIыфэ, тихабзэ, тыбзэ, тишъуашэ зетэхьэфэ лъэпкъыр щыIэщт. СурэтышI-модельерэу СтIашъу Юрэ лъэпкъ шъуашъэр дунаим щаригъэшIагъ. Мамырныгъэр гъэпытэгъэным иIэшIагъэ пэпчъ къыфэджэ, — къыIуагъ Долэ Долэт.
Адыгеим ис лъэпкъхэм я Унэ ипащэу Шъхьэлэхъо Аскэр, Адыгэ Республикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан, АР-м исурэтышIхэм я Союз итхьаматэу Елена Абакумовар ыкIи нэмыкIхэр зэхахьэм къыщыгущыIагъэх.
Адыгеим искусствэхэмкIэ иансамблэхэм къатыгъэ концертыр ащ къыкIэлъыкIуагъ. Адыгэ Республикэм идизайнер пэрытхэм ашIыгъэ адыгэ шъуашэхэр сценэм къыщагъэлъэгъуагъэх. Модельерхэу Даур Людмилэ, Мыгу Рузанэ, Бэджэкъо Бэлэ яIэшIагъэхэр, Пэунэжь Мариет ихъулъфыгъэ шъошэ къэгъэлъэгъонэу «Нур», ансамблэу «Налмэсым» ишъуашэхэр къэгъэлъэгъоным хагъэхьагъэх. Модельерхэм яIофшIагъэхэр адыгэ лъэпкъым фагъэхьыгъэх, ащ итарихъ, ишэн-хабзэхэр, итхыпхъэ къырагъэлъэгъукIы.
ЗэхэщакIохэри хьакIэхэри СтIашъу Юрэ фэгушIуагъэх, ежьыри Iофтхьабзэм хэлажьэхэрэм афэрэзагъ, лъэпкъым игушъхьэбаиныгъэ къызэраухъумэрэр гопэшхо зэрэщыхъурэр къариIуагъ.Iофтхьабзэр зэращагъ АР-м изаслуженнэ журналистэу Беданэкъо Замирэрэ ОелI Адамрэ .Уилъэпкъ шIу плъэгъун, уитарихърэ уикультурэрэ къэуухъумэнхэ зэрэфаем адыгэ шъуашэм и Мафэ фэIорышIэ.Пушкиным и Унэ ыIупэ щызэхащэгъэ адыгэ джэгумкIэ мэфэкIыр аухыгъ.ЛъэпшъыкъоФатим.