Зэрэдунаеу щызэ­лъашIагъ

Адыгэ Республикэм и ЛIышъхьэу КъумпIыл Мурат лъэпкъ шъуашэм и МафэкIэ республикэм исхэм къафэгу­шIуагъ: «Илъэс 15-кIэ узэкIэIэбэжьмэ, общественнэ движениеу «Адыгэ Хасэр» кIэщакIо зэрэфэхъу­гъэм тетэу мэфэкIыр Адыгеим щыхагъэунэфыкIэу рагъэжьагъ ыкIи бэ темышIэу къэралыгъо мэхьанэ ащ иIэ хъугъэ.ОшIэ-дэмышIагъэ хэлъэу а мафэр къыхахыгъэп: Iоныгъом и 28-м — адыгэ модельер цIэрыIоу СтIашъу Юрэ Махьмуд ыкъор къызыхъугъэм ар тыра­гъэфагъ. Адыгэ лъэпкъыр лъэшэу зэрыгушхорэ шъуашэр зэлъя­гъэшIэгъэнымкIэ ащ бэ фызэшIокIыгъэр.Адыгэ хъулъфыгъэ шъуашэр зэрэдунаеу щызэлъашIагъ. Ащ щыщыбэ Кавказым щыпсэурэ лъэпкъхэми, къэзэкъхэми къызфагъэфедагъ. Пачъыхьэгъур Урысыем щызыIыгъыгъэхэми цыер агу рихьыщтыгъ.Бзылъфыгъэ шъуашэм (саем) адыгэ пшъашъэм идэхагъэрэ игоIугъэрэ къы­кIегъэтхъы. Шъуашэр ежь-ежьырэу зыдыщтыгъэхэм, дышъэидэкIэ зы­гъэ­кIэракIэщтыгъэхэм ящытхъу сыдигъуи аIощтыгъ. Лъэпкъ шэныр, хэбзэ-зэхэтыкIэхэр зыпкъырызыщэгъэ шъуашэр адыгэхэм ятамыгъэ хъугъэ. Ащ зи лые хэлъэп, зэкIэри щызэкIужьы, бгъэфедэнкIэ Iэры­фэгъу.Адыгэ культурэр зыгъэлъэпIэрэ пстэуми мы мэфэкIымкIэ сафэгушIо!»