Урысыем и Къэралыгъо Думэ ихэдзынхэм якIэуххэм нафэ къызэрашIыгъэмкIэ, тиреспубликэкIэ нэбгыритIу Парламентым ипалатэ хэхьагъэх: зы мандат зиIэ хэдзыпIэ коеу N 1-мкIэ хадзыгъ депутатэу, «Единэ Россием» хэтэу Владислав Резник, ябгъонэрэ зэIугъэкIэгъумкIэ УФ-м и Къэралыгъо Думэ партиеу «Единэ Россием» ыцIэкIэ шъолъыр кандидат купым щыщэу пхырыкIыгъэр федеральнэ программэу «ЛIыхъужъхэм яуахът» зыфиIорэм хэлажьэу, хэушъхьафыкIыгъэ дзэ операцием иветеранэу, ЛIыхъужъныгъэм иордениплI къызфагъэшъошагъэу, подполковникэу Сергей Ковалевыр ары. ТекIоныгъэм пае сафэгушIо Владислав Матус ыкъомрэ Сергей Юрий ыкъомрэ!
Владислав Резник тиреспубликэ ыцIэкIэ ящэнэрэу Къэралыгъо Думэм хэхьагъ. Илъэс пчъагъэм ащ къыгъэшъыпкъэжьыгъ Адыгеим ифедэхэр апэрэ чIыпIэм зэригъэуцухэрэр, парламентариим бэ зэшIуихыгъэр республикэмкIэ мэхьанэшхо зиIэ Iофтхьабзэхэмрэ проектхэмрэ пхырыщыгъэнхэмкIэ. Владислав Матус ыкъор дэгъоу ащыгъуаз хэбзэихъухьан IофшIэнымрэ хэбзэ къулыкъухэм язэдэлэжьэнрэ. Арышъ, тыфэлъаIо джащ тетэу кIэухышIухэр фэхъухэзэ иIофшIэн лъигъэкIотэнэу.Сергей Ковалевми дэгъу дэдэу зыкъыгъэлъэгъуагъ. Президент программэу «ЛIыхъужъхэм яуахът» зыфиIорэмкIэ сэ сынаIэ тетэу зеджэ лъэхъаным муниципальнэм къыщегъэжьагъэу шъолъыр лъэгапIэм нэсэу хэбзэ къулыкъухэм яIофшIэн зэрэзэхэщагъэм дэгъоу нэIуасэ зыфишIыгъ. Ары пакIошъ, хэушъхьафыкIыгъэ дзэ операцием хэлажьэхэрэмрэ иветеранхэмрэ, ахэм яунагъохэм арысхэм IэпыIэгъу ятыгъэнымкIэ пшъэрылъэу щытхэм язы Iахьышхо ыплIэIу рилъхьажьыгъ. А лъэныкъом дэгъоу зэрэщыгъуазэм ишIуагъэкIэ зэфагъэ хэлъэу нэбгырэ пэпчъ тефэрэр IукIэнымкIэ бэ ыгъэцэкIагъэр: цIыфхэм заIуигъакIэщтыгъ, ахэр зыгъэгумэкIыхэрэр зэшIохыгъэ зэрэхъухэрэм гъунэ лъифыщтыгъ.
Урысыем и Къэралыгъо Думэ идепутат IэнатIэкIэ Сергей Ковалевым исэнэхьат IэпэIэсэныгъи ицIыфыгъи къызэрэфэфедэщтхэм, шIэныгъэу зэригъэгъотыгъэр республикэмрэ хэгъэгумрэ яфедэ хэлъэу IэубытыпIэ къызфишIын зэрилъэкIыщтым сицыхьэ телъ.Сергей Юрий ыкъом илъэс 35-рэ зэрэхъугъэр джырэблагъэ хигъэунэфыкIыгъ. АщкIэ сыфэгушIо ыкIи сыфэлъаIо псауныгъэ пытэ иIэнэу, гуетыныгъэ хэлъэу гъэхъэгъакIэхэм къафэкIонэу!