Юнармиер
Тарихъ шIэжьыр къызэтегъэнэжьыгъэным, патриотическэ пIуныгъэ ныбжьыкIэхэм ягъэгъотыгъэным афытегъэпсыхьагъэу Адыгеим идзэ-щытхъу чIыпIэхэр автомобилькIэ къакIухьагъэх. Iофтхьабзэм хэлэжьагъэхэр къушъхьэлъэ лъагъохэм къарычъагъэх, республикэм ичIыпIэхэу диным епхыгъэхэм ащыIагъэх. Ахэм зэу ащыщ Михайло-Афонскэ чылысыр.
Адыгеим ичIыопс идэхагъэ зэрэзэрагъэлъэгъугъэм нэмыкIэу, Iофтхьабзэм хэлэжьагъэхэм уахътэхэр зэрэзэпхыгъэр зэхашIагъ. ЗэхэщакIохэм къызэраIуагъэмкIэ, ятэжъ пIашъэхэм лIыхъужъныгъэу зэрахьагъэм нэмыкIынэкIэ еплъыжьынхэу, тарихъ кIэным уасэу иIэр зэхашIэнэу амал яIагъ.Iофтхьабзэм хэлэжьагъэх Адыгэ Республикэм лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт, Адыгэ Республикэм ис лъэпкъхэм я Унэ ипащэу Шъхьэлэхъо Аскэр, гъунапкъэхэм якъэухъумэнкIэ ветеранхэм я Мыекъопэ къэлэ совет ипэублэ организацие итхьаматэу Игорь Кубановыр.ЕгъэшIэрэ машIом дэжь щыкIогъэ зэхахьэм автомобилистхэр, юнармейцэхэр, общественнэ организациехэм ялIыкIохэр, ветеранхэр, къэлэдэсхэр хэлэжьагъэх. Хэгъэгу зэошхом илъэхъан Хэгъэгум ишъхьафитыныгъэ къэзыухъумагъэхэм лъэшэу зэрафэразэхэр мыщ къыщаIуагъ. Заом щыфэхыгъэхэм язэхэт мыжъобгъу къэгъагъэхэр кIэлъыралъхьагъэх.Адыгэ Республикэм иветеранхэу гъунапкъэхэр къэзгъэгъунагъэхэм я Совет итхьаматэу Игорь Кубановым къызэриIуагъэмкIэ, ныбжь зэфэшъхьаф зиIэхэр Iофтхьабзэм зэрипхыгъэх.