АР-м ис цIыф лъэпкъхэм я Ун
Лъэпкъ шхыныгъомэ яфестиваль блэкIыгъэ шэмбэтым къутырэу Гавердовскэм щыкIуагъ. Iофтхьабзэм кIэщакIо фэхъугъэр Урысыем щыпсэурэ цIыф лъэпкъхэм я Ассамблее икъутамэу АР-м щыIэр ары.
Шъолъырым цIыф лъэпкъэу щыпсэухэрэм якультурнэ обществэхэм ялIыкIохэр, Мыекъуапэ дэсхэр ыкIи ихьакIэхэр Iофтхьабзэм хэлэжьагъэх.ШIуфэс гущыIэхэмкIэ фестивалым хэлажьэхэрэм закъыфагъэзагъ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковым, Урысыем щыпсэурэ цIыф лъэпкъхэм я Ассамблее икъутамэу АР-м щызэхэщагъэм ипащэу ЛIымыщэкъо Рэмэзан, АР-м ис цIыф лъэпкъхэм я Унэ ипащэу Шъхьэлэхъо Аскэр ыкIи лъэпкъ-культурнэ обществэхэм ялIыкIохэр.— Фестивалыр шэпхъэ лъагэмэ адиштэу зэхащагъ. Ащ лъэпкъ культурэм, шэн-хабзэхэм нахь пэблагъэ тафешIы, лъэпкъ зэфэшъхьафхэр зэрэшIэнхэм икъэкIуапI. Урысыем щыпсэурэ цIыф лъэпкъхэм языкIыныгъэ и Илъэс диштэу, тызэгъусэу тизэпхыныгъэ дгъэпытэным тыфэлэжьэн фае, — хигъэунэфыкIыгъ Шъхьэлэхъо Аскэр.Фестивалым къекIолIэгъэ хьакIэхэм лъэпкъ шхыныгъохэр ауплъэкIугъэх, зэнэкъокъухэм ахэлэжьагъэх. Адыгеим итамыгъэхэр зытет шIухьафтынхэр текIоныгъэ къыдэзыхыгъэхэм аратыгъэх.Лъэпкъ-культурнэ обществэхэм хэхъоныгъэ ашIыным, шъолъырым щыпсэурэ цIыф лъэпкъхэм язэкъошыныгъэрэ язэгурыIоныгъэрэ гъэпытэгъэным Iофтхьабзэр фэIорышIагъ.