АР-м и ЛIышъхьэ ипресс-къулыкъу
Джырэ адыгэ орэдхэм яя 3-рэ мэфитIу фестивалэу «Зэхэоха фест» Мыекъуапэ щыкIуагъ. Пост-фолк шъуашэм илъэу ащ дэлажьэхэрэр зы пчэгум щиугъоигъэх. ЗэкIэмкIи Адыгеим, Къэбэртэе-Бэлъкъар Республикэм ыкIи Темыр Осетием — Аланием къарыкIыгъэ купий Iофтхьабзэм хэлэжьагъ. Ахэр: Нэгъой Заур, Абыдэ Артур «Джэныкъор» игъусэу, «Шыблэ», «ШъоКъу», «Гъуо», «Vynd», «RаgonBal», «Мыст» ыкIи «Ащэмэз». Ахэм яхьатыркIэ ижъырэ орэдыжъхэм непэрэ къэIукIэ зэряIэр, ар зэрэзэмылIэужыгъор Iофтхьабзэм къекIолIагъэхэм зэхахыгъ. Электроникэм, рокым ыкIи поп-музыкэм яамалхэр ижъырэ мэкъамэхэмрэ лIэужыкIэхэмрэ язэпхыныгъэ илъэмыдж хъугъэ.ЗэхэщакIохэм къызэрэхагъэщыгъэмкIэ, мыщ фэдэ шъуашэм илъэу адыгэ орэдхэм адэлажьэхэрэр зы пчэгум къищэгъэнхэр фестивалым ипшъэрылъ шъхьаIэхэм ащыщ. Ащ лъэпкъ культурэмрэ джырэ къэIукIэмрэ зикIасэхэр зэфещэх.ЗэхэщакIохэм ягухэлъ къадэхъугъ пIон плъэкIыщт. Нэбгыришъэ пчъагъэ фестивалым Мыекъуапэ игупчэ щиугъоигъ. КIэлакIэхэм ямызакъоу, зыныбжь хэкIотагъэхэри ахэм ахэтыгъэх.Фестивалыр мафэм аублагъ. Ащ къыдыхэлъытэгъэ Iофтхьэбзэ зэфэшъхьафхэр, лъэпкъ Iэпэщысэхэм яшIынкIэ егъэджэнхэр, джэгукIэхэр, къэгъэлъэгъонхэр Лениным ыцIэ зыхьырэ гупчэм щыкIуагъэх, лъэпкъ шэн-хабзэу ахэм апылъхэр агъэлъэгъуагъэх, аIотагъэх. Купмэ къатыгъэ концертыр ахэм къакIэлъыкIуагъ. Фестивалым еблэгъагъ АР-м и ЛIышъхьэу КъумпIыл Мурат. ЗэдэгущыIэнхэм, нэIуасэ зэфэхъунхэм ичIыпIэу, унагъор, ныбджэгъухэр уигъусэхэу уздэкIошъущт Iофтхьабзэу «Зэхэоха фест» зыфиIорэр зэрэхъугъэр ихъытыу нэкIубгъохэм къащитыгъ.— Урысыем илъэпкъхэм языкIыныгъэ и Илъэс тефэу, шъолъыр зэфэшъхьафхэм ямузыкантхэр ыкIи яIэпэIасэхэр фестивалым зэрэзэфищагъэхэр мэхьэнэ ин. Мыщ фэдэ Iофтхьабзэхэм лъэпкъ культурэр къаухъумэ ыкIи хэлажьэхэрэм ятворчествэкIэ цIыфыбэхэм адэгощэнхэу амал агъоты. ТапэкIэ фестивалым ыкIуачIэ зэрэхэхъощтым сицыхьэ телъ, — къыщиIуагъ КъумпIыл Мурат MAX-м.Фестивалыр пчыхьэ кIасэ нэс кIуагъэ, адыгэ джэгур ащ кIэух фэхъугъ.Анцокъо Ирин.