Теннис цIыкIумкIэ зэнэкъокъоу Мыекъуапэ щырагъэкIокIыгъэм Адыгэ Республикэм ыкIи Пшызэ шъолъыр ащыпсэурэ быслъымэнхэм ащыщхэр хэлэжьагъэх.
Мы спорт лъэпкъыр зыгу рихьырэ нэбгырэ 46-мэ заушэтыгъ. Ахэм аныбжь илъэси 10-м къыщегъэжьагъэу 60-м нэс.Iофтхьабзэм кIэщакIо фэхъугъ Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ. Къэзэрэугъоигъэ быслъымэнхэр зэнэкъокъугъэх, яныбджэгъуныгъэрэ язэпхыныгъэрэ агъэпытагъ.
Зэнэкъокъум икIэух едзыгъо гъэшIэгъонэу кIуагъэ. ЗэIукIэгъоу яIагъэхэм текIоныгъэр къащыдахи финалым щызэIукIагъэх Мыекъуапэ щыщ Чэтэо Хьасанрэ Кощхьаблэ щыпсэурэ Тутарыщ Бислъанрэ. Чэтаор 2:0-у текIуагъ, апэрэ хъугъэ. Ящэнэрэ чIыпIэм фэбэнагъэх поселкэу Инэм къэзыгъэлъэгъорэ Нэхэе Байслъанрэ Ермэлхьаблэ щыщ Черим Куровымрэ. Инэм илIыкIо 2:0-у нахь лъэшыгъ.ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм медальхэр, кубокхэр ыкIи ахъщэ шIухьафтынхэр афагъэшъошагъэх. Джащ фэдэу хэушъхьафыкIыгъэу къыхагъэщыгъэх ЛIыхъурэе Мэджыдрэ (илъэс 57-рэ ыныбжь, зэкIэми анахьыжъ) Ламыкъо Алимрэ (илъэси 10, пстэуми анахьыкI).Мы зэнэкъокъум джыри зэ къыгъэлъэгъуагъ спортым цIыфхэр зэрипхынхэ, зыкIыныгъэр ыгъэпытэн зэрилъэкIырэр.