А. Гусев
Адыгеим и ЛIышъхьэу КъумпIыл Мурат Мыекъопэ районым ит псэупIэу Тульскэм IофшIэгъу зэIукIэгъу иIэу щыIагъ.
Псыхъоу Шъхьэгуащэ инэпкъ изытет ащ зэригъэлъэгъугъ. Мыщ ыпэкIэ псэупIэм дэсхэм зэхахьэу яIагъэм къыщаIэтыгъагъ нэпкъыр къызэрэгоурэм иIофыгъо, а чIыпIэм щыпсэухэрэми яунэхэм щынагъо къафыкъокIыщтыгъ.Республикэм и ЛIышъхьэ Тульскэм иурамэу Лениным ыцIэ зыхьырэм щыпсэухэрэ Марина Мочальниковамрэ Марина Ельниковамрэ аIукIагъ, Iофхэм язытет гъэтэрэзыгъэным тегущыIагъэх. А зэдэгущыIэгъум хэлэжьагъэх АР-м цIыфхэм якъэухъумэнкIэ ыкIи ошIэ-дэмышIэ IофхэмкIэ и Комитет итхьаматэу Андрей Колесник, АР-м тыкъэзыуцухьэрэ дунаим ыкIи чIыопсым якъэухъумэнкIэ и ГъэIорышIапIэ ипащэу Сергей Колесниковыр, Мыекъопэ районым ипащэу Михаил Марьиныр.ГъэIорышIапIэм ипащэ къызэриIуагъэмкIэ, псыхъом инэпкъ изы Iахь къыгоуныр къызхэкIыгъэр ятIэр шъабэ зэрэхъугъэр ары, джащ фэдэу псыр къыдэкIымэ ыкIи ощхышхохэр щыIэхэмэ, шынэгъакIэу чIым хэлъри нахьыбэ мэхъу.
Iофыгъом изэшIохынкIэ хэкIыпIэу афалъэгъугъэхэм ащыщых къуладжэр укъэбзыгъэныр, Шъхьэгуащэ инэпкъ мыжъохэмкIэ гъэпытэгъэныр. ЦIыфхэу а чIыпIэм пэблагъэу псэухэрэм игъоу къафалъэгъугъэхэм адырагъэштагъ ыкIи амал зэриIэкIэ нахь псынкIэу ищыкIэгъэ Iофтхьабзэхэр зэрахьанхэм къыкIэлъэIугъэх.КъумпIыл Мурат къулыкъухэм ыкIи муниципалитетым иадминистрацие пшъэрылъ афишIыгъ пIэлъэ кIэкIым къыкIоцI проект-сметэ документхэр агъэхьазырынхэу, мылъкур къызхэкIыщтыр агъэнэфэнэу ыкIи псэолъэшIын Iофхэм афежьэнхэу.«ЦIыфхэм IофыгъошхокIэ зыкъытфагъэзагъ, псынкIэу ар зэшIохыгъэн фае. ИщыкIэгъэ амалхэр зэкIэ ащкIэ щыIэх, хэдзакIохэм яшIоигъоныгъэхэмкIэ IофшIэнэу агъэцэкIэщтхэм къадыхэлъытагъэу Мыекъопэ районым ыцIэкIэ депутатхэри а Iофым къыхэдгъэлэжьэщтых. Муниципалитетым ыкIи ГъэIорышIапIэм япащэхэр Iофэу агъэцэкIэщтым зэдеусагъэх, цIыфхэми ахэм къадырагъэштагъ. Мы илъэсым Iофтхьабзэхэр зэшIотхыщтых», — къыIуагъ КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.