Делэкъо А.
Урысые общественнэ кIэлэцIыкIу-Iэтэхъо организациеу «НыбжьыкIэ инспекторхэм я Урысые движение» (ЮИД-м) ишъолъыр къутамэ мы мафэхэм мэфэкI шIыкIэм тетэу Адыгеим къыщызэIуахыгъ.
Iофтхьабзэр В. В. Лемешевым ыцIэ зыхьырэ гурыт еджапIэу N 2-м щыкIуагъ.КIэлэцIыкIухэр зыхэфэхэрэ гъогу хъугъэ-шIагъэхэр нахь макIэ шIыгъэнхэм епхыгъэ пэшIорыгъэшъ Iофтхьабзэхэр нахьыбэу зэхэщэгъэнхэмкIэ, къыткIэхъухьэрэ лIэужхэм гъогурыкIоным ишапхъэхэр амыукъоным фэщэгъэнхэмкIэ мыщ мэхьанэшхо иI.Iофтхьабзэм хэлэжьагъэх гъогурыкIоныр щынэгъончъэным дэлэжьэгъэнымкIэ ЮИД-м ипащэу Валентина Кульбицкаяр, АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, республикэ Къэралыгъо автоинспекцием ипащэу Андрей Огурцовыр, мы къулыкъум и ГъэIорышIапIэ пропагандэмкIэ иотдел ипащэу Бзэджэжъыкъо Мурат, нэмыкIхэри.— ГъогурыкIоныр кIэлэцIыкIухэмкIэ щынэгъончъэным пае ЮИД-м икъутамэ республикэм зэритыщтым мэхьанэшхо иI. Илъэс 50-м ехъугъ ар зыщыIэр, ау джы движением лъэныкъуакIэхэр къыхэтэгъахьэх. Зэрэхэгъэгоу пштэмэ, ныбжьыкIэ минишъэ пчъагъэ мыщ зэрепхы. Шъолъыр къутамэм шIуагъэ къызэритыщтыр гъэнэфагъэ, амалыкIэхэр къызфэжъугъэфедэхэзэ, кIэлэцIыкIухэр зыхэлэжьэхэрэ гъогу хъугъэ-шIагъэхэр нахь макIэ джыри хъуным шъузэрэдэлэжьэщтым тицыхьэ телъ, — къыIуагъ Валентина Кульбицкаям.АР-м хэгъэгу кIоцI IофхэмкIэ иминистрэ ыцIэкIэ къэзэрэугъоигъэхэм шIуфэс къарихыгъ Андрей Огурцовым.ЯцIыкIугъом къыщегъэжьагъэу гъогум узэрэщызекIон фаер арагъэшIэнэу зэрэщытыр къыкIигъэтхъыгъ. ЮИД-р кружок закъоу щымытэу, мэхьанэ зиIэ Iофыгъохэр зэрэщызэшIуахыхэрэр къыIуагъ. ЫпэрапшIэу гъогум тет кIэлэцIыкIум щынагъо къызыпыкIыщт лъэныкъом гу лъитэным зэрэфагъасэрэр, зыфэсакъын фаехэр зэрэрагъашIэхэрэр, щынэгъончъэу зекIоным зэрэфащэрэр Къэралыгъо автоинспекцим ипащэ къыIуагъ.— ЮИД-м иотрядхэм яIофшIэн еджэпIэ щыIэныгъэм зэрэщыпхыращырэм шIогъэ гъэнэфагъэ пылъ. Егъэджэн сыхьатхэм къадыхэлъытагъэу гъогурыкIоным ишапхъэхэм афэгъэхьыгъэ Iофтхьабзэхэр зэхащэх. Инспектор ныбжьыкIэхэм ядвижение епхыгъэ къутамэ тиIэ зэрэхъугъэр дэгъу, республикэм игъогухэм хъугъэ-шIагъэу къащыхъухэрэм къащыкIэнымкIэ шIуагъэ къытыщт. ЮИД-м епхыгъэ егъэджэнхэр, Iофтхьабзэхэр гъэсэныгъэ IофшIэным хэгъэхьэгъэнхэмкIэ министерствэр IэпыIэгъу къышъуфэхъущт, джащ фэдэу мы лъэныкъомкIэ кIэлэеджакIохэм ягухэлъхэр щыIэныгъэм щыпхырыщыгъэнхэмкIэ тишIуагъэ къышъодгъэкIыщт, — къыIуагъ Артем Журавель.НыбжьыкIэхэм зыкъызэIуахынымкIэ ыкIи тигъогухэм щынэгъончъагъэр ащыгъэпытэгъэнымкIэ шъолъыр къутамэр амалышIоу зэрэщытыр Бзэджэжъыкъо Мурат къыхигъэщыгъ. Къэралыгъо автоинспекцием гъэсэныгъэм иучреждениехэр игъусэхэу зэрихьэрэ IофшIэнхэм ягугъу къышIыгъ. ГъогурыкIоным ишапхъэхэм афэгъэхьыгъэ шъолъыр ыкIи республикэ зэнэкъокъухэм тикIэлэеджакIохэр зэрахэлажьэхэрэр ыкIи яшIэныгъэхэмкIэ къазэрахэщыхэрэр къыкIигъэтхъыгъ.Iофтхьабзэм икIэухым движением икIэлэегъэджэ анахь дэгъухэм ыкIи иинспектор ныбжьыкIэхэм щытхъу тхылъхэр ыкIи рэзэныгъэ тхылъхэр аратыгъэх.ДЕЛЭКЪО Анет.