Газпром
Адыгеим ишIэжь чIыпIэхэм джыри зы къахэхъуагъ.
Шэуджэн районым ит псэупIэу Дукмасовым тичIыгогъу дзэкIолIэу Хэгъэгу зэошхом щыфэхыгъэхэм ясаугъэтэу щыгъэпсыгъэм ЕгъэшIэрэ машIор мэфэкI шIыкIэм тетэу щатIупщыгъ. Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, ащ игуадзэу, Урысыем и ЛIыхъужъэу Цэй Эдуард, Шэуджэн район администрацием ипащэу Аулъэ Рэщыдэ, Iахьзэхэлъ обществэу «Газпром газораспределение Майкоп» ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIохэрэм япащэу ЕкъутэкI Аслъан.АР-м и ЛIышъхьэ ыцIэкIэ Iофтхьабзэм хэлэжьагъэхэм къафэгушIуагъ Владимир Нарожнэр. ЕгъэшIэрэ машIом изэкIэгъэблэн гъэстыныпхъэ шхъуантIэр псэупIэхэм ащыкъудыигъэнымкIэ лъэбэкъушIу закъоу щымытэу, лъэхъанхэм язэпхыныгъи зэригъэлъэшырэр ащ къыIуагъ.«Газпромым» мыщ фэдэ шIэжь чIыпIэу Урысыем щызэкIигъэблагъэхэмкIэ къутырыр я 2000-рэ хъугъэ. Ар гъэцэкIэгъэным пае гъэстыныпхъэ шхъуантIэм ирыкIуапIэ шIэжь чIыпIэм ращэлIагъ. Урысые Iофтхьабзэу «ТекIоныгъэм имашIо тэухъумэ» зыфиIорэм къыдыхэлъытагъэу ар агъэцэкIагъ.Саугъэт зэхэтыр 1970-рэ илъэсым зэкъош къэхалъэм ычIыпIэ агъэпсыгъагъ. 2023-рэ илъэсым къэралыгъом иухъумакIохэм ялIэужхэм язэпхыныгъэ къэзыгъэлъэгъорэ саугъэтыр щагъэуцугъагъ. Краснодар щыщ гъукIэу Денис Мильченкэм ар иIофшIагъ. Ащ иунэкъощ кIалэу къутырэу Дукмасовым щыщыр хэушъхьафыкIыгъэ дзэ операцием хэкIодагъ.— Хэгъэгум зыпсэ фэзытыгъэхэм тазэрэфэразэм ЕгъэшIэрэ ыкIи шIэжь машIохэр яшыхьатых. Ахэм талъыплъэныр ыкIи саугъэтыкIэхэр гъэстыныпхъэм икIуапIэ пытшIэнхэр типшъэрылъ, тапэкIи ар дгъэцэкIэщт, — къыIуагъ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз» зыфиIорэм ипэщэ шъхьаIэу Сергей Густовым.