«Адыгеим иныбжьыкIэхэр»
Къэралыгъо 20-мэ къарыкIыгъэ лIыкIохэр зыхэт купыр Адыгеим ихьэкIагъ.
Республикэм икультурэ ыкIи ичIыопс идэхагъэ ахэр нэIуасэ афашIыгъэх.НыбжьыкIэхэм я Дунэе фестиваль ишъолъыр программэ хэтэу IэкIыб къэралыгъо 20-мэ къарыкIыгъэ нэбгырэ 26-рэ Iоныгъом и 20-м къыщыублагъэу и 22-м нэс Адыгэ Республикэм щыIагъэх. Фестиваль шъхьаIэр Екатеринбург Iоныгъом и 11 — 17-м щыкIуагъ. Ащ ыуж IэкIыб къэралыгъохэм къарыкIыгъэ ныбжьыкIэхэм апае Урысыем ишъолъырхэм зекIохэр афызэхащагъэх.Адыгеимрэ Къэрэщэе-Щэрджэсымрэ зэгъусэхэу лIыкIохэр ахьэкIагъэх. Шъолъырхэм якультурнэ шапхъэхэм адиштэу Iофтхьабзэхэр зэхащагъэх. Адыгэ къашъомкIэ лъэпкъ ансамблэу «Абреки» зыфиIорэм икъэгъэлъэгъон хьакIэхэр еплъыгъэх, лъэпкъ къашъохэмкIэ, музыкальнэ Iэмэ-псымэхэм якъегъэIонкIэ, хэдыкIынымкIэ десэхэр ныбжьыкIэхэм афызэхащагъэх. Лъэпкъ шхыныгъоу хьалыжъор арагъэшIыгъ, арагъэуплъэкIугъ.Шъолъырым ичIыопс идэхагъэ нэIуасэ афэзышIыгъэ зекIо хьалэмэтхэр афызэхащагъэх. Азэщ гъочIэгъ цIыкIум ыкIи иным ачIагъэхьагъэх, Хьаджыкъо тIуакIэм рыкIуагъэх.Адыгеим икультурэ, шъолъырым шэн-хабзэу илъхэм, республикэм иныбжьыкIэхэм ягукъэкIыхэм къэралыгъо хабзэр IэпыIэгъу къафэхъузэ зэрадэлажьэхэрэм хьакIэхэр нэIуасэ афэхъугъэх.