Адыгэ Республикэм илIыкIо кушъхьэфэчъэ спортымкIэ Урысыем ичемпионат хагъэунэфыкIырэ чIыпIэ къыщыдихыгъ. Iофтхьабзэр гъогоу «Мыекъуапэ — ТIуапсэ» зыфиIорэм щыкIуагъ, спортсменхэм километри 145,2-рэ къачъын фэягъ.
Мы мафэм ом изытет зэрэдэгъугъэм, укъызэдэчъэнымкIэ амалышIоу зэрэщытыгъэм къыхэкIэу спортсменхэм къэгъэлъэгъон дэгъухэр яIэнхэм ущыгугъын плъэкIыщтыгъ. Апэрэ чIыпIиплIыр къыдэзыхыгъэхэм азыфагу охътэ мэкIэ дэд къыдэфагъэр. ТекIоныгъэр фагъэшъошагъ Москва илIыкIоу Сергей Косаревым. ЯтIонэрэ чIыпIэм нэбгырищ фэбэнагъ, ахэм ахэтыгъэ Лъэустэнджэл Даниил джэрз медаль къыхьыгъ. Къалэу Тюмень щыщ Семен Макаровым тыжьын медаль къыдихыгъ.
УФ-м спортымкIэ и Министерствэ, Адыгэ Республикэм физическэ культурэмкIэ ыкIи спортымкIэ и Комитет ыкIи Урысые спорт фондыр зэнэкъокъум изэхэщэнкIэ IэпыIэгъу хъугъэх.Лъэустэнджэл Даниил, ар зыгъасэхэрэм тафэгушIо, тиспортсмен джыри нахь лъэгэпIэ инхэм анэсынэу фэтэIо.