Лъэпшъыкъо Ф.
Красногвардейскэ районым ит хъызмэтшIэпIэ пэрытхэм ащыщэу Хъунэго Гощпакъэ пэщэныгъэ зыдызэрихьэрэм тыгъэгъазэм иIухыжьын ыублагъ. Мы уахътэм ехъулIэу гектар 407-м щыщэу 130-р Iуахыжьыгъ. Аугъоижьырэ лэжьыгъэм чIыгулэжьхэр егъэразэх — гурытымкIэ зы гектарым центнер 25-рэ къырахы.Губгъо IофшIэнхэр зэрэзэшIуахыхэрэм тащигъэгъозагъ унэгъо хъызмэтым иIофхэр зезыгъэкIорэ Хъунэго Арсен.
— Сятэ кIэщакIо фэхъугъэу илъэс 20-м ехъугъэу чIыгулэжьыным тиунагъо пылъ. ТихъызмэтшIапIэ анахьэу зыфэгъэзагъэр пынджым, коцым, соем, тыгъэгъазэм якъэгъэкIын. НэмыкI лэжьыгъэ лъэпкъхэм тадэлажьэрэп. ПстэумкIи чIыгу гектар 2000-м ехъу тиI. Ащ щыщэу коцым гектар 252-рэ едгъэубытыгъ, соем — 205-рэ, тыгъэгъазэм — 407-рэ, пынджым — 1549-рэ. Мы аужырэ тхьамафэхэм тыгъэгъазэм иIухыжьын тыпылъ, — къеIуатэ чIыгулэжьым.ЧIыгум зэрифэшъуашэу удэлажьэу, аужырэ технологиехэр бгъэфедэхэу, лэжьэкIо Iашъхьэхэм уащымыкIэмэ, гъэхъагъэхэм узэранэсыщтыр теубытагъэ хэлъэу тигущыIэгъу къеIо. Ахэм афэдэ зэгурыIожь купэу, илъэс пчъагъэ хъугъэу нэбгырэ 20 пындж заводым Iут, чIыгум дэлажьэрэр нэбгырэ 15.
— Ушъхьамысэу ищыкIагъэр чIыгум хэплъхьан фае, етIанэ лэжьыгъэр бэгъощт. ТынаIэ лъэшэу зытедгъэтыхэрэр трактористхэмрэ комбайнерхэмрэ. Ахэм IэпэIэсэныгъэ аIэкIэмылъмэ, зэкIэри хьаулый. Пынджыр ыкIи тыгъэгъазэр зытелъыгъэ чIыгум илъэситфырэ нэмыкI культурэхэр ащытэпхъых, — еIо Хъунэго Арсен.Лэжьыгъэ бэгъуагъэ унагъом къыхьыжьыным илъэс псаум нэбгырабэ дэлажьэ.— Тыгъэгъазэм иIухыжьын зытыухкIэ, пынджымрэ соемрэ тафежьэщт. Пынджыр зэрэтылэжьырэм имызакъоу, продукцие хьазырхэри къыдэтэгъэкIых. Чэщ-зымафэм предприятием пындж тонн мини 150-рэ къыдигъэкIын ылъэкIыщт. Анахьэу тызыгъэгушIорэр кIэлэ ныбжьыкIэхэм Iоф щашIэнэу къызэрэтфакIохэрэр ары. Заводым зедгъэушъомбгъун гухэлъхэр тиI. Пынджыр зыщытшIэщт чIыгум гектар 300-м ехъу мыгъэ хэдгъэхъонэу дгъэхьазырыгъэ. Пындж хьаджыгъэм икъыдэгъэкIын типроектыкIэхэм ащыщ, ау хьаджыгъэм иIугъэкIын тIэкIу тытещыныхьэ, — къыхегъэщы тигущыIэгъу.
Къэралыгъом щыхъурэ-щышIэхэрэм япхыгъэу Iофыгъоу чIыгулэжьхэм апашъхьэ къиуцуагъэхэм ащыщ Iуахыжьыгъэ лэжьыгъэр зэрифэшъуашэу IуагъэкIын зэрамылъэкIыгъэр. 2026-рэ илъэсым Iуахыжьыгъэ коцым уасэ иIэп, лэжьыгъэр зыщэфын щыIэп, ащ къыхэкIэу коцыр ягъэтIылъыпIэ ралъхьагъ.Хъунэго Гощпакъэ имэкъумэщ-фермер хъызмэтшIапIэ изегъэушъомбгъункIэ АР-м и ЛIышъхьэу КъумпIыл Мурат, АР-м мэкъу-мэщымкIэ и Министерствэ анаIэ къызэратетым, къэралыгъо IэпыIэгъу къызэраратырэм афэшI республикэм ипащэхэм зэрафэразэр къыхагъэщыгъ.2025-рэ илъэсым КъумпIыл Мурат хъызмэтшIапIэм зеблагъэм къулыкъу гъэнэфагъэхэм пшъэрылъ афишIыгъ чIыгулэжь чанхэм сыд фэдэрэ лъэныкъокIи IэпыIэгъу арагъэгъотынэу. Мэкъумэщ хъызмэтым илъэныкъо зэфэшъхьафхэм апылъ цIыф чанхэм IэпыIэгъу афэхъугъэныр пшъэрылъ шъхьаIэхэм ащыщэу къызэрэнэжьырэр ащ хигъэунэфыкIыгъ.Лъэпшъыкъо Фатим.