Iэшъынэ А.
«Адыгееу сигупсэр» зыцIэ бжыхьэ къэгъэлъэгъон Адыгэ Республикэм и Мафэу къэблагъэрэм ипэгъокIэу Сурэт къэгъэлъэгъуапIэм къыщызэIуахыгъ.
Тиреспубликэ исхэм ямызакъоу, тишъолъыр зышIолъапIэхэмкIэ, ащ рыгушхохэрэмкIэ ыкIи ар ятарихъ чIыгужъэу зылъытэхэрэмкIэ мэхьанэшхо зиIэгъэ хъугъэ-шIагъэхэр къизыгъэлъэгъукIырэ сурэт 70-м ехъу къэгъэлъэгъоным хэхьагъ. Ахэм ахэтых Урысыем, Адыгеим янароднэ сурэтышIхэм, культурэм изаслуженнэ IофышIэхэм яIофшIагъэхэр, Сурэт къэгъэлъэгъуапIэм ифонд къыхэхыгъэхэри, унэе коллекциехэм ащыщхэри.Сурэт къэгъэлъэгъуапIэм ипащэу, АР-м изаслуженнэ журналистэу Кушъу Светланэ зэхахьэр къызэIуихыгъ.— Адыгэ Республикэм имэфэкI фэгъэхьыгъэ къэгъэлъэгъоныр тисурэтышIхэм къагъэбаигъ. ТичIыгу щыпсэурэ лъэпкъхэм ятарихъ, ящыIакIэ, янепэрэ псэукIэ, чIыопсыр сурэтхэм къагъэлъагъо. ЛIэужыкIэм гурышэ-гупшысэ куухэр агу къыщигъэущынхэм, щыIэныгъэр икъоу зэхарагъэшIэным къыфэджэрэ Iэпэщысэхэр непэ тинэрылъэгъух. Тидунай дахэ, мамырныгъэ щыIакIэ ащ ерэлъ, — къыIуагъ Кушъу Светланэ.— Адыгэ Республикэм лъэпкъыбэу исхэм тызэдэIужьэу, тызэгурыIоу тыщызэдэпсэу, республикэм къэралыгъо гъэпсыкIэ ыгъотыгъэу, дахэу ыпэкIэ лъэкIуатэ. Тиреспубликэ идахэ, идэгъу аIэтызэ сурэтышIхэм яIэшIагъэхэр агъэпсыгъ, — къыIуагъ АР-м исурэтышIхэм я Союз итхьаматэу Елена Абакумовам.Адыгеим исурэтышI цIэрыIохэу Бырсыр Абдулахь, ЛэупэкIэ Нурбый, Къат Теуцожь, Хъуажъ Рэмэзан, Къуанэ Аслъан, Тыгъужъ Махьмуд, Павел Амасьян, ДыдыкI Нурбый, СтIашъу Юрэ ыкIи нэмыкIхэм яIофшIагъэхэр къэгъэлъэгъоным хэхьагъэх.
Тыкъэзыуцухьэрэ дунаим идэхагъэ сурэтышIхэм яIофшIагъэхэмкIэ IупкIэу къаIуатэ: къушъхьэ жэкIэфхэр, псыхъо чъэрхэр, мэз дахэхэр, лэжьыгъэ бэгъуагъэ къызэрахыжьырэ чIыгухэр, культурэм, шIэныгъэм, спортым япхыгъэхэр.Къэгъэлъэгъоным икъызэIухын мэхьанэ зиIэ хъугъэ-шIэгъэ къодыеп — IэпэIасэхэм яIофшIагъэхэр къыхэгъэщыгъэнхэм иамалэуи щыт.Урысыем исурэтышIхэм я Союз имедальхэр юбилярхэм аратыжьыгъэх. Тыжьын медалэу «Духовность. Традиции. Мастерство» зыфиIорэр — Ольга Бреславцевам, дышъэ медалэу «За заслуги в изобразительном искусстве» — Елена Абакумовам ыкIи Виктор Коваленкэм афагъэшъошагъэх.«Адыгеим исурэтышIхэр» зыфиIорэ къэгъэлъэгъонэу Темыр Осетием къыщызэIуахыгъэм хэлэжьэгъэ IэпэIэсэ 23-мэ щытхъу тхылъхэмрэ дипломхэмрэ аратыжьыгъэх.«Адыгееу сигупсэр» зыфиIорэ зэнэкъокъум изэфэхьысыжьхэри ашIыгъэх. СурэтышIхэу Лидия Дорогавцевам, Ирина Середа, Татьяна Цветовам дипломхэр аратыгъ. Социальнэ хъытыумкIэ кIогъэ мэкъэтыным икIэуххэмкIэ Ксения Муштай къыхагъэщыгъ.Бжыхьэ къэгъэлъэгъоныр зыфытегъэпсыхьагъэр цIыфхэм искусствэм гухахъо хагъотэныр ыкIи ячIыпIэ гупсэ идэхагъэ зэхашIэныр ары.Iофтхьабзэм Адыгэ Республикэм ишIэныгъэлэжьхэм ащыщхэр, сурэтышIхэр, сурэттеххэр, АР-м культурэмкIэ и Министерствэ илIыкIохэр, искусствэхэмкIэ колледжэу Тхьабысымэ Умарэ ыцIэ зыхьырэм истудентхэр, зекIохэр хэлэжьагъэх.МэфэкIым ипэгъокIэу къэгъэлъэгъонэу агъэхьазырыгъэр чъэпыогъум и 11-м нэс зэIухыгъэщт.Лъэпшъыкъо Фатим.