Ф. Суздалев
Адыгеим икъэлэ шъхьаIэ иурамхэу Крыловым ыцIэ зыхьырэмрэ Ветеранхэм яурамрэ псышIоим ирыкIуапIэхэр мы мафэхэм ащызэблахъух. Мыекъопэ къэлэ администрацием къызэритырэмкIэ, агъэкIэжьыщтыр пстэумкIи километритф мэхъу.
А рыкIуапIэхэм ямызакъоу, псы шIоир зэрылъэдэщт псынэхэри кIэу ашIых. ПстэумкIи 80-у агъэнэфагъэм щыщэу 66-р агъэпсыгъах. Къалэм икъокIыпIэ лъэныкъо щыIэ псы рыкIуапIэхэм зягъэушъомбгъугъэныр ары пшъэрылъ шъхьаIэр, сыда пIомэ, ахэм илъэс пчъагъэм бэу атегъэогъагъ.НахьыпэкIэ чIэлъыгъэхэм анахь инэу ыкIи анахь пытэу чIалъхьэрэ кIуапIэхэм псы шIоир арычъэщт, унакIэхэри апашIэнхэ ахэм алъэкIыщт.Псы шIоим ирыкIуапIэхэр лъэпкъ проектэу «ЩыIэныгъэм пае инфраструктурэр» зыфиIорэм хэхьэрэ федеральнэ проектэу коммунальнэ инфраструктурэм игъэкIэжьын фытегъэпсыхьагъэм къыщыдэлъытагъэу зэблахъух.
Адыгеим и ЛIышъхьэу КъумпIыл Мурат шъолъырым хэхъоныгъэ егъэшIыгъэнымкIэ ащ мэхьанэшхо зэриIэр мызэу, мытIоу къыхигъэщыгъ: «Шапхъэхэм адиштэрэ коммунальнэ инфраструктурэр чIыпIэхэм хэхъоныгъэ ашIыным ылъапс. Псы къабзэм, псы шIоим, гъэстыныпхъэ шхъуантIэм, электроэнергием япхыгъэ псэуалъэхэмкIэ тищыкIэгъэ кIуачIэхэр икъоу тиIэхэмэ, псэупIэ проектхэр пхырытщынхэ, хъызмэтшIэпIакIэхэр, социальнэ псэолъакIэхэр дгъэуцунхэ тлъэкIыщт. Ащ фэшI игъорыгъоу коммунальнэ инфраструктурэр гъэкIэжьыгъэнымкIэ федеральнэ IэпыIэгъу пстэур тэгъэфедэ, тэ амалэу тиIэри хэтэлъхьэ. ЦIыфхэм ящыIакIэ нахьышIу хъуными ар фэIорышIэщт».2025-рэ илъэсым Мыекъуапэ псы къабзэм ирыкIуапIэхэр чIыпIэ 14-мэ ащагъэкIэжьыгъ. Ащ ишIуагъэкIэ, псэу ахэм арыкIорэм чIэнагъэу ышIырэр нахь макIэ, шапхъэхэм адиштэрэ псы къабзэ цIыфхэм аIэкIахьэ хъугъэ.