МКъТУ-м ипресс-къулыкъу
Мыекъопэ къэралыгъо технологическэ университетым Федеральнэ программэу «Обучение служением» зыфиIорэм ияплIэнэрэ чэзыу тыгъуасэ къызэIуахыгъ.
Шъугу къэдгъэкIыжьын, Урысые Федерацием и Президент игукъэкIыкIэ ар зэхащэ.Мыр федеральнэ Iофтхьэбзэ инэу щыт, ныбжьыкIэхэр шIушIэным ыкIи общественнэ мэхьанэ зиIэ Iофтхьабзэхэм нахьыбэу ахэлэжьэнхэм фэщэгъэнхэм фэIорышIэ.— «Обучение служением» зыфиIорэр гъэсэныгъэ программэ инэу щыт, ащ къыдыхэлъытагъэу студентхэм социальнэ проектхэр зэхагъэуцох ыкIи щыIэныгъэм щыпхыращых. Хэбзэ къулыкъухэр, бизнесым илIыкIохэр, сатыум емыпхыгъэ организациехэр ягъусэхэу ныбжьыкIэхэм зигъо къэсыгъэ общественнэ Iофыгъохэр зэшIуахых, еджэн Iофым щыпхыращых. Джыри студентхэзэ къыхахыгъэ сэнэхьатым игъусэу социальнэ проектэу шIушIэным фытегъэпсыхьагъэхэр зэхагъэуцонхэ, ахэр щыIэныгъэм щыпхыращыжьынхэ амал яI. Нэбгырэ пэпчъ цIыфхэмкIэ шIуагъэ къэзыхьыщт лъэныкъохэр ыгъэцэкIэнхэ ылъэкIыщт, — къыIуагъ апшъэрэ еджапIэм ипроректорэу, программэм игъэцэкIакIоу Людмила Задорожнаям.Федеральнэ программэр апшъэрэ еджапIэм зэрифэшъуашэу щызэхащэнымкIэ къатефэрэр зэкIэ зэрагъэцакIэрэр нэужым ащ къыхигъэщыгъ. Ащ ишIуагъэкIэ студентхэм шIэныгъэ куу зэрагъэгъотын зэралъэкIырэр, шъолъырым щызэшIуахырэ Iофыгъохэм нахь апэблагъэ зэрэхъухэрэр хигъэунэфыкIыгъ.— Мы программэм тиапшъэрэ еджапIэ зэрэхэлажьэрэм мэхьанэшхо иI. СтудентхэмкIэ ащ шIогъэ гъэнэфагъэ пылъ. Шъхьадж зыфеджэрэ лъэныкъом елъытыгъэу социальнэ гумэкIыгъохэм язэшIохын ныбжьыкIэхэр хэщэгъэнхэр, волонтер ыкIи IэпыIэгъу закъоу щымытхэу, къиныгъохэр дэгъэзыжьыгъэнхэм фэIорышIэрэ проектхэр агъэхьазырынхэр, ахэр щыIэныгъэм щыпхыращыжьынхэр ары пшъэрылъ шъхьаIэр. ГъэрекIо къыщегъэжьагъэу «Апэрэхэм я Движение» тиIэпыIэгъоу Iофтхьабзэхэр зэхэтэщэх. Ащ ишIуагъэкIэ IофшIэным гурыт еджапIэхэм ащеджэхэрэри къыхэтэгъэлажьэх. ГъэрекIо гурыт еджэпIэ 50 фэдизмэ тащыIагъ, кIэлэеджакIохэр социальнэ проектхэм ягъэпсын къыхэдгъэлэжьагъэх. Мы илъэсми лъыпытыдзэжьыщт, — къыIуагъ Людмила Задорожнаям.Организацие зэфэшъхьафхэм социальнэ пшъэрылъхэр ныбжьыкIэхэм къафагъэуцух, ахэр зэшIуахых. ГущыIэм пае, зипсауныгъэкIэ илэгъухэм акIэмыхьэхэрэм машIом зыкъиштэмэ макъэ зэрагъэIущтым епхыгъэу агъэхьазырыгъ. Джащ фэдэу сэкъатныгъэ зиIэхэм Iэрыфэгъу щыIакIэ яIэным фытегъэпсыхьэгъэ лъэныкъо пчъагъэ студентхэм къадэхъугъ.Мыекъопэ къэралыгъо технологическэ университетым мы федеральнэ программэр зэрифэшъуашэу зэрэщызэшIуахырэр ащ къыхигъэщыгъ. Шъолъырым ыкIи хэгъэгум социальнэ хэхъоныгъэхэр ашIынхэм фытегъэпсыхьэгъэ проектхэм ныбжьыкIэхэр зэрахэлажьэхэрэм мэхьанэшхо зэриIэр къыIуагъ.Платформэу «Добро.рф» зыфиIорэм илъэныкъоу «Городская среда» зыцIэу ежьыр зэпхыгъэм нэужым къытегущыIагъ, мэкъэтынэу ащ щыкIохэрэм цIыфхэр нахьыбэу къыхэлэжьэнхэмкIэ волонтерхэм зэшIуахырэ IофшIэным ишIуагъэ къызэрэкIорэр къыхигъэщыгъ.Iофтхьабзэм къыдыхэлъытагъэу апшъэрэ еджапIэм шIушIэ инфраструктурэу IэкIэлъхэм апэрэ курсым къычIэхьагъэхэр нэIуасэ фашIыгъэх, платформэу «Добро.рф» зыфиIорэм иамалхэр арагъэшIагъэх. Джащ фэдэу 2026 — 2027-рэ еджэгъу илъэсхэм шIушIэ ыкIи общественнэ Iофэу ашIэнэу рахъухьэхэрэм атегущыIагъэх.ДЕЛЭКЪО Анет.