ПцэжъыеешэнымкIэ Республикэу Болгарием изэIухыгъэ Кубок икъыдэхын фэгъэхьыгъэ зэнэкъокъу Iоныгъом и 17-м къыщегъэжьагъэу и 20-м нэс мы къэралыгъом и Пловдивскэ хэку щыкIуагъ.
Болгарием пцэжъыеешэн спортымкIэ и Федерацие ригъэблагъэхи, Урысыем ихэшыпыкIыгъэ командэ хэт Адыгэ Республикэм илIыкIохэр ащ хэлэжьагъэх.Турнирым зыщаушэтыгъ спортымкIэ дунэе класс зиIэ Сергей Артюхинымрэ спортымкIэ мастерэу Чэтыжъ Тимуррэ, спортымкIэ дунэе класс зиIэ мастерхэу Вадим Гасановымрэ Руслан Брызгуновымрэ.Зэнэкъокъур сыхьат 72-рэ кIуагъэ. Тиспортсменхэм зэрифэшъуашэу зыкъагъэлъэгъуагъ, баллэу къахьыгъэхэмкIэ хагъэунэфыкIырэ чIыпIэхэр къафагъэшъошагъэх. Вадим Гасановымрэ Руслан Брызгуновымрэ дышъэ медальхэр къахьыгъ, Сергей Артюхинымрэ Чэтыжъ Тимуррэ ятIонэрэ хъугъэх.ПсыубытыпIэу Ай Тепе щызэхащэгъэ турнирым тиспортсменхэр апэрэу хэлэжьагъэх. Ахэм къянэкъокъугъэх IэпэIэсэныгъэшхо зиIэ болгарскэ командэхэр — 2026-рэ илъэсым зэхащэгъэ дунэе чемпионатым зыщызыушэтыгъэхэр. Джырэ уахътэм дунэе рейтингым ахэм ятфэнэрэ чIыпIэр щаIыгъ. Арышъ, республикэм илIыкIохэм гъэхъэгъэшхо зэрашIыгъэр нафэ.АР-м пцэжъыеешэн спортымкIэ и Федерацие зызэхащагъэр илъэсих нахь мыхъугъэми, ащ ихэшыпыкIыгъэ командэ плIэгъогогъо Урысыем ичемпион хъугъэ. Тиспортсменхэм тафэгушIо, тапэкIи мыщ фэдэ гъэхъэгъэшIухэр ашIынхэу, Адыгеим ыцIэ дахэкIэ рарагъэIонэу афэтэIо.