Фондэу «Хэгъэгум иухъумакIохэр»
Iоныгъом и 23-м Волгоград хэкум щыIэ ухъумэкIо-спортивнэ лагерэу «Авангард» зыфиIорэм Урысые джэгукIэу «Унэгъо зарницэм» иятIонэрэ едзыгъо ифинал щырагъэжьагъ. Ащ шъолъыр командэ 84-мэ ахэхьэрэ нэбгырэ 330-рэ зэрипхыщт, Iоныгъом и 30-м нэс рагъэкIокIыщт.
«Унэгъо зарницэр» зэхэщэгъэныр зигукъэкIыгъэр статс-секретарэу — УФ-м зыухъумэжьыгъэнымкIэ иминистрэ игуадзэу, Къэралыгъо фондэу «Хэгъэгум иухъумакIохэм» итхьаматэу Анна Цивилевар ары, 2025-рэ илъэсым Урысые гъэцэкIэкIо комитетэу «ТекIоныгъэм» изэхэсыгъо ар къыхилъхьэгъагъ, УФ-м и Президентэу Владимир Путиным къыдыригъэштэгъагъ.Ар зэхащагъ Къэралыгъо фондэу «Хэгъэгум иухъумакIохэм», Апэрэхэм я Движение, Урысые дзэ-патриотическэ общественнэ движениеу «Юнармием», дзэ-спорт ухьазырыныгъэм ыкIи ныбжьыкIэхэр патриотэу пIугъэнхэмкIэ Гупчэу «ВОИН» зыфиIорэм.
«Унэгъо зарницэр» патриотическэ пIуныгъэмрэ лIэужхэм язэпхыныгъэ икъэухъумэнрэ атегъэпсыхьагъ. Проектым зыкъыщызыгъэлъэгъорэ унагъохэр зэнэкъокъу зэфэшъхьафыбэхэм ахэлажьэх, зэдеIэжьых ыкIи пшъэрылъым зэгъусэхэу фэкIох.Гъэсэныгъэ, спорт ыкIи культурнэ программэхэр финалистхэм къафагъэхьазырыгъэх. Ащ къыхеубытэх «Гъогу квест-джэгукIэр», унагъомэ чIыпIи 10 къакIухьэ ыкIи ары пэпчъ яшIэныгъэхэр къагъэлъагъо — апэрэ IэпыIэгъур сымаджэ хъугъэм е зищыкIагъэм зэрэрагъэкIыщтым къыщыублагъэу цIыф зэрымыс быбырэ пкъыгъом игъэIорышIэн ыкIи радио зэпхыныгъэхэм анэсыжьхэу. Едзыгъоу акIурэмэ зэкIэми десэхэр къакIэлъэкIох, финалым ихьащтхэр ащ тетэу къыхахых.Финалым ипрограммэ хэтых кIэпсэ къалэр къэпкIуныр, зекIонымкIэ десэхэр, зызэрагъэбылъырэ хъытыухэм яхъын. Унагъомэ ятарихъ къыраIотыкIы, ащ пае «ЛIэкъо чъыгхэр» ашIых, унэгъо шхыныгъо IэшIухэр агъэхьазырых, ямышIыкIэ творческэ амалхэр къагъэлъагъохэзэ, фэшъхьафыбэхэмкIэ зэнэкъокъух.Зэнэкъокъум хэлажьэхэрэр Волгоград нэIуасэ фашIых, ащ итарихъ къафаIуатэ, чIыпIэ гъэшIэгъонэу иIэхэм ащагъэгъуазэх.Мыгъэрэ джэгунхэм ахэлэжьэрэ унагъохэр нэбгырэ плIырыплI зэрэхъухэрэр: нахьыжъитIурэ илъэс 11-м нэс зыныбжь кIэлэцIыкIуитIурэ. Финалым ихьанхэм ыпэкIэ ахэр муниципальнэ, чIыпIэ ыкIи шъолъыр едзыгъохэм апхырыкIыгъэх.Шэуджэн районым щыщ унагъоу Калайдинхэм Адыгеир Урысые зэнэкъокъухэм къащагъэлъагъо. Ны-тымэ къызэраIуатэрэмкIэ, якIалэхэр цIыкIу дэдагъэх мыщ фэдэ унэгъо ыкIи кIэлэцIыкIу зэнэкъокъухэм ахэлажьэхэ ашIоигъо зэхъухэм. Командэр зыфэдэр къагурыIоу, зэгъусэхэу текIоныгъэм фэбэнэнхэ шэнэу ахэлъ хъугъэр джащ фэдэ зэнэкъокъухэм къахэкIыгъ.«Тызфэдэ шъыпкъэр зэтлъэгъулIэжьыгъ. Унэм уисы хъумэ фэшъхьаф, мыдыкIэ узэгъусэу десэхэр къэошIых, пфэшIэщтымкIэ зыкъэогъэлъагъо — ар фэшъхьаф шъыпкъ. Ащ гушъхьэ кIуачIэр къеIэты, унагъор нахь зэкъуегъэуцо, ар тэр-тэрэу къыдгурэIожьы. ЗэкIэ тшIогъэшIэгъоныгъ, зэкIэ лъэш дэдэу тыгу рихьыгъ», — къыддэгощагъэх командэм хэтхэр.Финалым Калайдинхэр фэзыгъэхьазырыгъэр хэушъхьафыкIыгъэ дзэ операцием иветеранэу Евгений Праздниковыр ары. Евгений Казань къыщыхъугъ, илъэс пчъагъэ хъугъэу Мыекъуапэ щэпсэу, поселкэу Тульскэм лъэпкъ культурэм и Гупчэу дэтым ипащэ игуадзэу Iоф ешIэ, ишъхьэгъусэрэ ежьыррэ сабыищ зэдапIу.Чъэпыогъу мазэм 2022-рэ илъэсым ар хэушъхьафыкIыгъэ дзэ операцием хэлэжьэнэу ыублагъ, дзэ пшъэрылъхэр ЛНР-м ыкIи ДНР-м ащигъэцэкIагъэх, бригадэм иинженернэ-сапернэ батальон иштаб ипащэ иIэпыIэгъугъ. Зэзэгъыныгъэу зыкIэтхагъэр зеухым, 2023-рэ илъэсым ижъоныгъокIэ мазэ дзэм къыхэкIыжьыгъ. ДжырэкIэ ар дзэ-патриотическэ клубым игъэсакIу, лIыхъужъныгъэм идесэхэр еджапIэхэм ащехьых. Джащ фэдэу ар IофышIэхэм ягъэхьазырынкIэ программэу «Адыгеим и ЛIыхъужъхэр» зыфиIорэм хэлэжьагъ, хэушъхьафыкIыгъэ дзэ операцием иветеранхэм я Ассоциациеу Адыгэ Республикэм щыIэм хэт.«Тэ шъолъыр едзыгъор ткIугъахэ, джы урысые едзыгъом зыфэтэгъэхьазыры. Тишъолъыр зэрифэшъуашэу, дэгъу дэдэу къэдгъэлъэгъоным тыфэхьазыр», — къыIотагъ Евгений Праздниковым.«ТигъэсакIоу Евгений Сергей ыкъом джырэ нэс тымышIэщтыгъэ лъэныкъо горэхэм тынаIэ атырытигъэдзагъ. КъызэрэчIэщыгъэмкIэ, упчIабэхэм яджэуапмэ тащыгъозагъэп, джы кIуачIэу тиIэр зэхэтшIэн тлъэкIыгъэ. ГущыIэм пае, ориентированиер картэмкIэ ыкIи компасымкIэ къыдгуригъэIуагъ, ахэм япхыгъэ десэхэр зэхэтфынхэмкIэ къыддэIэпыIагъ, зэкIэри тэрэзэу къэтшIышъугъ. ТапэкIэ джыри Евгений тыдэлэжьэнэу тыфай», — къыIотагъ унагъом ибысымгуащэу Ирина Калайдинам.