А. Гусев
Адыгеим и ЛIышъхьэу КъумпIыл Мурат АР-м хэдзынхэмкIэ и Гупчэ комиссие и Тхьаматэу Сэмэгу Нурбый IофшIэгъу зэIукIэгъу дыриIагъ.
Урысые Федерацием и Къэралыгъо Думэ идепутатхэм, АР-м и Къэралыгъо Совет — Хасэм идепутатхэм, Джэджэ, Красногвардейскэ, Теуцожь районхэм ялIыкIо къулыкъухэм ядепутатхэм яхэдзынхэр зэрэкIуагъэм икIэуххэм мыщ щатегущыIагъэх.АР-м хэдзынхэмкIэ и Гупчэ комиссие и Тхьаматэ къызэриIуагъэмкIэ, шапхъэу щыIэхэм адиштэу, хэукъоныгъэхэр амышIэу хэдзынхэр республикэм щыкIуагъэх. Адыгеим исхэм япроцент 79,37-рэ ахэм ахэлэжьагъ, нэбгырэ мин 267-рэ фэдиз хэдзыпIэхэм къякIолIагъ. Политическэ партиехэм, кандидатхэм, общественнэ институтхэм ялъыплъэкIо мин 1,1-м ехъумэ хэдзынхэр зэрэкIорэм гъунэ лъафыгъ.Мэкъэтыным икIэуххэм атетэу зы мандат зиIэ хэдзыпIэ коеу N 1-мкIэ Адыгэ Республикэм ыцIэкIэ Урысые Федерацием и Къэралыгъо Думэ идепутатэу хадзыгъ депутатэу, «Единэ Россием» хэтэу Владислав Резник. ХэдзакIохэм япроцент 67-мэ амакъэ ащ фатыгъ.Федеральнэ хэдзыпIэ коимкIэ хэдзакIохэм амакъэу партиехэм афатыгъэр: «Единэ Россием» — процент 65,82-рэ; ЛДПР-м — проценти 9,32-рэ, «Партия прямой демократии» зыфиIорэм — процент 0,19-рэ; партиеу «Зеленые» — процент 0,43-рэ; партиеу «Справедливая Россия» — проценти 5,07-рэ; партиеу «Родинэм» — процент 0,42-рэ; КПРФ-м — процент 11,91-рэ; «Партия пенсионеров» зыфиIорэм — процент 0,75-рэ; партиеу «Коммунисты России» — процент 0,53-рэ; партиеу «Новые люди» — проценти 4,52-рэ.ЗыкI хэдзыпIэ коимкIэ яенэрэ зэIугъэкIэгъумкIэ Адыгэ Республикэм и Къэралыгъо Совет — Хасэм идепутатхэм яхэдзынхэр зэрэкIуагъэм икIэуххэм атетэу депутат мандат 25-р мыщ тетэу атырагощагъ: «Справедливая Россия» зыфиIорэм — 1; «Единэ Россием» — 18, КПРФ-м — 3; ЛДПР-м — 2; «Новые люди» зыфиIорэм — 1.Зы мандат зиIэ хэдзыпIэ койхэмкIэ депутат мандат 24-р «Единэ Россием» къыгъэлъэгъогъэ кандидатхэм, зы мандатыр ЛДПР-м икандидатым аратыгъ. Джащ тетэу къэтIон тлъэкIыщт АР-м и Къэралыгъо Совет — Хасэм мы къыкIэлъыкIорэ партиехэм ялIыкIохэр зэрэхэхьагъэхэр: «Единэ Россием» — депутат 42-рэ, КПРФ-м — депутати 3, ЛДПР-м — депутати 3, «Новые люди» — зы депутат, «Справедливая Россия» зыфиIорэм — зы депутат.Муниципальнэ хэдзынхэм мандати 166-рэ депутатхэм щаратыгъ. Ащ щыщэу 129-р «Единэ Россием» икандидатых, КПРФ-м — 3, ЛДПР-м — 10, «Справедливая Россия» зыфиIорэм — 14, «Новые люди» — 5, нэбгыритфым ежь-ежьырэу зыкъыгъэлъэгъожьыгъ.Республикэм ипащэ хэдзын компаниер дэгъоу зэрэзэхащагъэр хигъэунэфыкIыгъ, АР-м хэдзынхэмкIэ и Гупчэ комиссие, хэдзынхэмкIэ комиссиехэм ахэтыгъэхэм, политическэ партиехэм ялIыкIохэм, хэдзынхэм алъыплъагъэхэм, хэбзэухъумэкIо къулыкъухэм зэрафэразэр къыIуагъ.«Адыгеим щыпсэухэрэм чанэу хэдзынхэм зэрахэлэжьагъэхэм пае рэзэныгъэ гущыIэхэр афэзгъазэ сшIоигъу. Мы илъэситф благъэм тиреспублики, Урысыеми хэхъоныгъэу ашIыщтыр мы хэдзынхэм зэрялъытыгъэр къыдгурыIощтыгъ. ЦIыфхэм шIоигъоныгъэу яIэхэр хэдзынхэм къагъэлъэгъуагъэх, хэдзынхэм якIэуххэм атетэу парламент партие пстэури АР-м и Къэралыгъо Совет — Хасэм зэрэхэхьагъэхэр тигуапэ хъугъэ. Республикэм ихэбзэихъухьэ къулыкъу хэдзэкIо пстэуми яшIоигъоныгъэхэр къыщыдэтлъытагъэ хъугъэх. Джащ фэдэу сичIыпIэгъухэм «тхьашъуегъэпсэу» ясэIо «Единэ Россием» цыхьэшхо къызэрэфашIырэм, зичэзыу пIалъэмкIэ шъолъырым ыцIэкIэ лIыкIоу Резник Владислав Матус ыкъор зэрэхадзыгъэм афэшI. Урысые Федерацием и Къэралыгъо Думэ идепутат IэнатIэ Iутзэ, республикэм ифедэхэм якъэгъэгъунэнкIэ ащ бэ зэшIуихыгъэр. IофшIэкIэшIоу IэкIэлъыр, шIэныгъэу иIэр къызфигъэфедэхэзэ, АдыгеимкIэ зигъо Iофыгъохэр шIуагъэ къытэу тапэкIи ащ зэрэзэшIуихыщтхэм сицыхьэ телъ», — къыIуагъ КъумпIыл Мурат.АР-м и ЛIышъхьэ ипресс-къулыкъукъытырэ къэбархэмкIэ ЛIышэ Саныет.