Iоныгъом и 18-м къыщегъэжьагъэу и 20-м нэс Урысыем и Къэралыгъо Думэ ыкIи Адыгеим и Къэралыгъо Совет — Хасэм ядепутатхэм яхэдзынхэу республикэм щыкIуагъэхэм язэфэхьысыжьхэм афэгъэхьыгъэ зэхэсыгъо тыгъуасэ АР-м хэдзынхэмкIэ и Гупчэ комиссие щызэхащагъ. Ар зэрищагъ ащ и Тхьаматэу Сэмэгу Нурбый.
Хэдзынхэр зыщыкIогъэ мафэхэм ыкIи зэфэхьысыжьхэр ашIыфэхэкIэ лъыплъэкIуи 1108-мэ Iоф зэрашIагъэр Гупчэ комиссием и Тхьаматэ игуадзэу Елена Майор къыIуагъ. Хэдзынхэр окIофэ ыкIи макъэхэр алъытэжьыхэ зэхъум шапхъэхэм адимыштэу зекIуагъэхэу лъыплъакIохэм зи зэрамыгъэунэфыгъэр, хэдзыпIэхэм зэмызэгъыныгъэхэр къачIэтэджагъэу къызэрэхэмыкIыгъэр ыкIи дэо тхылъ зи комиссием къызэрэфэмыкIуагъэр ащ къыхигъэщыгъ.Нэужым яенэрэ зэIугъэкIэгъумкIэ Урысые Федерацием и Федеральнэ ЗэIукIэ и Къэралыгъо Думэ идепутатынымкIэ зы мандат зиIэ хэдзыпIэ коеу N 1-м хэдзын бюллетенеу щагъэфедагъэхэм ХьацIэцIэ Фатимэ къатегущыIагъ. Пчъагъэу агъэхьазырыгъагъэр, ахэм ащыщэу агъэфедагъэр ыкIи агъэкIодыжьыгъэхэр къыIотагъ. Ащ къызэрэхигъэщыгъэмкIэ, хэбзэгъэуцугъэм диштэу пстэури зэшIохыгъэ хъугъэ.Нэужым яенэрэ зэIугъэкIэгъумкIэ Урысые Федерацием и Федеральнэ ЗэIукIэ и Къэралыгъо Думэ идепутатынымкIэ зы мандат зиIэ хэдзыпIэ шъолъырым щыкIогъэ хэдзынхэр республикэм зэрифэшъуашэу зэрэщызэхэщагъэр агъэунэфыгъ. Гупчэм иаппарат ипащэу Сихъу Азамат къызэриIуагъэмкIэ, зы мандат зиIэ хэдзыпIэ коимкIэ Адыгеим илIыкIоу Владислав Резник Къэралыгъо Думэм хэхьащт. Ар бэкIэ нэмыкIхэм апэ ишъыгъ.ЗыкI хэдзыпIэ коимкIэ АР-м и Парламент идепутатхэм яхэдзынхэм кIэухэу афэхъугъэхэм нэужым къатегущыIагъэх.Урысыем и Къэралыгъо Думэ ыкIи Адыгеим и Къэралыгъо Совет — Хасэм ядепутатхэм яхэдзынхэр хэбзэгъэуцугъэм диштэу республикэм щыкIуагъэхэу плъытэ зэрэхъущтыр комиссием хэтхэм зэдаштагъ, ащ епхыгъэ унэшъо гъэнэфагъэм кIэтхэжьыгъэх.Хэдзынхэм ахэлэжьагъэхэм чанэу япшъэрылъхэр зэрэзэшIуахыгъэр, ащкIэ ахэм зэрафэразэр Сэмэгу Нурбый къыхигъэщыгъ.ДЕЛЭКЪО Анет.