Iэшъынэ А.
2026 — 2027-рэ лъэхъанымкIэ гриппым пэшIуекIорэ уцым ихэлъхьан республикэм щаублагъ. Зэхэлъхьэгъу мин 220-м ехъур шъолъырым иIэзапIэхэм атырагощэнэу рахъухьагъ. Узыр къяутэкIыным ищынагъо зышъхьарытхэр апэ рагъэшъыщтых. Нэбгырэ пчъагъэу агъэнафэрэр, вакцинэу щыIэхэр зыфэдэхэр «Адыгэ макъэм» къыфиIотагъ Адыгэ Республикэм псауныгъэр къэухъумэгъэнымкIэ и Министерствэ иштат хэмыт врач-эпидемиолог шъхьаIэу, медицинэ шIэныгъэхэмкIэ кандидатэу Шъэожъ Альбинэ.
Прививкэхэм яхэлъхьанкIэ Лъэпкъ мэфэпчъым къыдыхэлъытагъэу, гриппым пэуцужьырэ вакцинэм ихэлъхьан епхыгъэ урысые Iофтхьабзэр рагъэжьагъ. Зэпахырэ узхэм зыкъамыIэтызэ, цIыфым ар хэплъхьаным мэхьанэшхо иI.Гриппыр псынкIэу зэпахырэ ыкIи зызыушъомбгъурэ узхэм ащыщ. ГухэкI нахь мышIэми, бэхэм мыр уз къызэрыкIоу алъытэ. Ау нэмыкI пэтхъу-Iутхъу узхэм зябгъапшэкIэ, къинэу цIыфым зэрэпэкIэкIырэм дакIоу, уз хьылъэхэр хэзыхыхэрэри, зидунай зыхъожьыхэрэри щыIэх. Ащ фэдэ тхьамыкIагъохэр къэмыхъунхэм фэшI игъом вакцинэр зыхарагъэлъхьанэу эпидемиологхэр къыфэджэх.
Агъэнэфэрэ пчъагъэр, зызщыхэплъхьащт уахътэрЗигугъу тшIырэ зэпахырэ узыр жъугъэу къызежьэрэр бжыхьэ кIасэр ыкIи кIымафэр ары. Мэхьанэ зиIэр эпидемиер къемыжьэзэ прививкэр зыхябгъэлъхьаныр ары. ТхьамэфитIу зытешIэкIэ пкъышъолым икъэухъумэн ащ регъажьэ ыкIи илъэс псаум екъу.— Вакцинэ зэхэлъхьагъу мин 220-м ехъу республикэм иIэзапIэхэм атырагощэнэу агъэнэфагъ. АпэрэмкIэ анахьэу тынаIэ зытедгъэтыщтыр шъолъырым щыпсэухэрэм ащыщэу щынэгъо купым халъытэхэрэм япроцент 75-р Iофтхьабзэм къыхегъэубытэгъэныр ары. Ахэр: кIэлэеджакIохэр, медицинэм ыкIи гъэсэныгъэм яIофышIэхэр, уз гъэтIылъыгъэ зиIэхэр, джащ фэдэу зыныбжь хэкIотагъэхэм япроцент 60-р. ЗэрагъэнэфагъэмкIэ, пстэумкIи кIэлэцIыкIу мин 46-м ыкIи ныбжь зиIэ нэбгырэ мини 180-мэ вакцинэр ахалъхьэщт, — хигъэунэфыкIыгъ Шъэожъ Альбинэ.Вакцинэу агъэфедэхэрэрМы илъэсым гриппым пэуцужьырэ вакцинэм иапэрэ Iахь республикэм къыIэкIэхьагъ. ЗэкIэмкIи зэхэлъхьэгъу 119150-рэ мэхъу. Ар кIэлэцIыкIухэми нахьыжъхэми ателъытагъ. Эпидемиолог шъхьаIэм къызэриIуагъэмкIэ, ыпэрэ илъэсхэм афэдэу ахэр валентнищэу зэхэтыщтых.
— Гриппым ивирус зэпымыоу зызэблехъу, арышъ, ащ диштэу эпидемием зызыщиушъомбгъурэ лъэхъаныр къемыжьэзэ вакцинэм изэхэлъыкIи хэплъэжьых, хэгъэхъожьынхэр фашIых. «Валентнэ» зэхэтыкIэм къикIырэр штамм пчъагъэу къыхиубытэрэр ары. Къыхэзгъэщымэ сшIоигъу, Урысыем къыщашIырэ вакцинэхэр зэкIэ лъэхъаным диштэу щынэгъончъэу ыкIи шIуагъэ къахьэу зэрэщытхэр. Псауныгъэр къэухъумэгъэнымкIэ Дунэе организацием къызэритыгъэмкIэ, 2025 — 2026-рэ илъэсхэм мы зэпахырэ узыр жъугъэу къызщяузыгъэ лъэхъанхэм валентни IV-у зэхэт вакцинэхэм яшIуагъэу къакIорэм къыщыкIэщтыгъэп валентни III-у зэхэтхэри. Сыда пIомэ грипп лъэпкъэу В-р (Yamagata) 2020-рэ илъэсым къыщегъэжьагъэу тишъолъырхэм къащекIокIыжьырэп, — къыIуагъ Шъэожъ Альбинэ.УзэриухъумэрэрГриппыр ыкIи нэмыкI зэпахырэ пэтхъу-Iутхъу узхэр къызыучъыIырэ лъэхъаным къежьэхэ хабзэ. Ау вирусхэм зызэрэзэблахъурэм къыхэкIэу, нэшанэу яIэри зэфэшъхьаф, зэфэмыдэу сымаджэхэм апэкIэкIы. БлэкIыгъэ илъэсхэм ашIыгъэ лъыплъэнхэм къызэрагъэлъагъорэмкIэ, нэшанэхэм зэблэхъугъэшхо афэхъурэп, икIыгъэ илъэсми гриппыр эпидемиологие шапхъэхэм ашъхьэдэкIыгъэп. Ар иммунизациер зэрыкIорэм занкIэу епхыгъ.Къыхэгъэщыгъэн фае, икIыгъэ илъэсым къыпхалъхьэгъэ прививкэм лъэхъаныкIэм ущиухъумэрэп, ар пкъынэ-лынэм мэзи 6 — 12 зэрэхэтырэр. Ау ащ къикIырэп Iахьэ тедзэу илъэсым тIо зыхябгъэлъхьанэуи, ащ пае ыкIуачIэ нахь лъэш хъурэп, изэрар псауныгъэм екIыщт. Вакцинэр илъэсым зэ къызэрэпхалъхьанэу щытыр.— Гриппыр къыомыутэкIынымкIэ вакцинэхэм яшIогъэшхо къэкIо. Джыри узым зимыушъобгъузэ, вакцинэр зыхябгъэлъхьанымкIэ мы уахътэр амалышIу. Вакцинэм цIыфым ииммунитет ыгъэпытэщт, ащ ишIуагъэ къэмыкIощтмэ, зыпари зэрар къыхьыщтэп. ЕгъэзыгъэкIэ ар зыми халъхьащтэп, ау къагурыIоу нахьыбэмэ зыхарагъалъхьэмэ, бэкIэ нахь дэгъу. Арышъ, кIэлэцIыкIухэр, щынэгъо купым къыхиубытэхэрэр къызэрэтыухъумэщтхэм тежъугъэгупшыс! — хигъэунэфыкIыгъ Шъэожъ Альбинэ.Вакцинэр зыщашIыщт чIыпIэрЗэрэхабзэу, гриппым пэуцужьырэ вакцинэр республикэм къызыIэкIахьэкIэ шъхьадж зыщыпсэурэ чIыпIэм ащыIэ IэзапIэхэм, район гупчэ сымэджэщхэм, амбулаториехэм, фельдшер-мамыку чIыпIэхэм зыщыхалъхьан алъэкIыщт.Iэшъынэ Сусан.