Адыгеим ис нэбгырищмэ къафаIэтыгъэ уголовнэ IофхэмкIэ Мыекъопэ къэлэ хьыкумым кIэух унашъор ыштагъ. Урысыем и Уголовнэ кодекс ия 204-рэ статья ия 3-рэ Iахь ипунктхэу «а»-м, «б»-м, ия 291-рэ статья иа 1-рэ Iахь, ия 327-рэ статья ия 3-рэ Iахь къащыдэлъытэгъэ бзэджэшIагъэхэр зэрахьагъэкIэ ахэр агъэмысагъэх.
2023-рэ илъэсым къыщегъэжьагъэу 2024-рэ илъэсым нэс унэе предпринимателым ухьазырыныгъэ гъэнэфагъэ зэрэзэрагъэгъотыгъэм фэгъэхьыгъэ документ нэпцIхэр къэрэгъулэ 17-мэ арищагъ.2025-рэ илъэсым ищылэ мазэ предпринимателым Урысые Федерацием илъэпкъ гвардие идзэхэм я Федеральнэ къулыкъу Адыгэ РеспубликэмкIэ и ГъэIорышIапIэ и Гупчэу лицензиехэмрэ Iизын тхылъхэмрэ къязытырэм иинспектор шъхьаIэ сомэ мин 17 хъурэ къуалъхьэ ритыгъ илъэIу тхылъхэм нахь псынкIэу ахэплъэнхэм пае.ИнэIоситIумэ ягъусэу мы бзылъфыгъэм бзэджэшIэгъэ заулэ зэрихьагъ. ИнэIуасэхэм языр сэнэхьат гъэсэныгъэ тедзэ языгъэгъотырэ унэе еджапIэм ипащэу щытыгъ. Къэрэгъулэу Iоф зышIэн зылъэкIыщтхэр ригъэджагъэхэ фэдэу тхылъ нэпцIхэр ащ ыгъэхьазырыщтыгъэх ыкIи предпринимателым ритыщтыгъэх. Адрэм зигугъу къэтшIыгъэ Гупчэм ахэр рихьылIэщтыгъэх удостоверениехэр къаратынхэм пае.Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ зэхищэгъэ уплъэкIунхэм якIэуххэм атетэу уголовнэ Iофыр къызэIуихыгъ ыкIи зэхифыгъ Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапIэ.Мыекъопэ къэлэ хьыкумым:— Урысыем и Уголовнэ кодекс ия 204-рэ статья ия 3-рэ Iахь, ия 290-рэ статья иа 1-рэ Iахь, ия 327-рэ статья ия 4-рэ Iахь ипунктэу «а»-м адиштэу инспектор шъхьаIэм илъэси 3-рэ мэзи 6-рэ колонием дэсынэу, хабзэм илIыкIо пшъэрылъхэр илъэскIэ ыгъэцэкIэн фимытэу ыгъэнэфагъ;— Урысыем и Уголовнэ кодекс ия 204-рэ статья ия 3-рэ Iахь, ия 291-рэ статья ия 3-рэ Iахь, ия 327-рэ статья ия 4-рэ Iахь адиштэу унэе предпринимателым илъэси 4 хьапсрэ тазырэу сомэ 50000-рэ тырилъхьагъ;— Урысыем и Уголовнэ кодекс ия 204-рэ статья ия 7-рэ Iахь, ия 327-рэ статья ия 4-рэ Iахь адиштэу сэнэхьат гъэсэныгъэ тедзэ языгъэгъотырэ унэе еджапIэм ипащэ илъэси 5-рэ мэзи 6-рэ колонием дэсынэу, гъэсэныгъэ языгъэгъотырэ унэе еджапIэхэм илъэскIэ япэщэн фимытэу ыгъэнэфагъ.Хьыкумым иунашъо джыри хэбзэ кIуачIэ иIэ хъугъэп.