«АГУ-Адыифым» иныбжьыкIэ командэ «Динамо-Синара-2-м» зэIукIэгъуитIу дыриIагъ. Анна Гермашевам ыгъэсэрэ пшъашъэхэм ухьазырыныгъэ дэгъу къагъэлъэгъуагъ, текIоныгъитIу къыдахыгъ.
Апэрэ ешIэгъур 34:32-у тигандболисткэхэм къахьыгъ. ЯтIонэрэр нахь къафэпсынкIагъ, 26:21-у текIоныгъэр къыдахыгъ. Тикомандэ щешIэхэрэм къахэщыгъ Дарья Цыкал. Апэрэ зэIукIэгъум ащ къэлапчъэм Iэгоуи 4 дидзагъ, ятIонэрэм – Iэгоуи 10. Мыщ фэдэ зэфэхьысыжьхэм яшIуагъэкIэ республикэм икомандэ я 6-рэ чIыпIэм къэкIуагъ.
Джырэ уахътэм турнир таблицэм командиплIымэ пэрытныгъэр щаIыгъ: «Звезда-2» (Звенигород), «Лада-СШОР» (Тольятти), «СК КК «Черноморочка-2» (Новороссийск) ыкIи «Астраханочка— СШОР» (Астрахань).Зэнэкъокъум командэ 12 хэлажьэ, спортсменкэхэм аныбжьыр илъэс 15-м щегъэжьагъэу 21-м нэс. Iоныгъом и 28 – 29-м тикомандэ Мыекъуапэ щешIэщт, первенствэм пэрытныгъэ щызыIыгъ командэхэм ащыщэу «СК КК «Черноморочка-2» зыфиIорэм IукIэщт.