Адыгеим и ЛIышъхьэу КъумпIыл Мурат Къэрэщэе-Щэрджэс Республикэм и ЛIышъхьэу Рашид Темрезовыр Пэщэ IэнатIэм зэрэIухьагъэм фэгъэхьыгъэ мэфэкI Iофтхьабзэу рекIокIыгъэм хэлэжьагъ.
Къэрэщэе-Щэрджэс Республикэм и Народнэ ЗэIукIэ изичэзыу зэхэсыгъо идепутатхэм Урысыем и Президентэу Владимир Путиным нэмыкIхэм ягъусэу къахилъхьэгъэ кандидатурэм зыкIыныгъэ ахэлъэу амакъэ фатыгъ.А Iофтхьабзэр Щэрджэскъалэ, республикэм и ЛIышъхьэ иадминистрацие зычIэт унэм щыкIуагъ. Ащ хэлэжьагъэх УФ-м и Президент Темыр-Къыблэ федеральнэ шъолъырымкIэ и Полномочнэ лIыкIоу Юрий Чайка, Урысыем ФедерациемкIэ и Совет исенаторхэр, УФ-м и Къэралыгъо Думэ идепутатхэр, хьыкумышIхэр, хабзэм ифедеральнэ къулыкъухэм ялIыкIохэр, джащ фэдэу хэгъэгум ишъолъыр заулэмэ япащэхэр.Рашид Темрезевым Къэрэщэе-Щэрджэсым цIыф лъэпкъ зэфэшъхьафхэм къахэкIыгъэхэу щыпсэухэрэм апашъхьэ гущыIэ пытэ къыщитыгъ цIыфым ифитыныгъэхэмрэ ишъхьафитыныгъэхэмрэ къыухъумэхэзэ зэришIыщтым, Урысые Федерацием и Конституциерэ ихэбзэгъэуцугъэхэмрэ зэрадэмыхыщтым ыкIи къызэриухъумэщтхэм афэгъэхьыгъэу. КъЩР-м и Народнэ ЗэIукIэ и Тхьаматэу Александр Ивановым къыIуагъ республикэм и ЛIышъхьэу икIэрыкIэу хадзыжьыгъэр иIэнатIэ зэрэIухьагъэр ыкIи КъЩР-м ибыракърэ ЛIышъхьэу зэрэхадзыгъэр къэзыушыхьатырэ тамыгъэмрэ къыритыжьыгъэх.Къэрэщэе-Щэрджэсым и ЛIышъхьэ депутатхэм къызэрэдырагъэштагъэм пае зэрафэразэр къыIуагъ ыкIи ежь ыпашъхьэкIи, республикэм ихэбзэ къулыкъухэм апашъхьэкIи пшъэрылъэу щытхэр къыгъэнэфагъэх. Республикэм тапэкIи хэхъоныгъэ ышIыным пае шIэныгъэу иIэр ыкIи IофшIэкIэшIоу IэкIэлъыр зэригъэфедэщтхэмкIэ, лъэпкъ проектхэмрэ къэралыгъо программэхэмрэ къадыхэлъытэгъэ проектышхохэу шъолъырым щыгъэцэкIэгъэн фаехэр гъэхъагъэ хэлъэу зэрэзэшIуахыщтхэмкIэ къыгъэгугъагъэх.Адыгеим и ЛIышъхьэу КъумпIыл Мурат иIофшIэгъу фэгушIозэ къызэрэхигъэщыгъэмкIэ, Урысыем и Президент цыхьэ къызэрэфишIыгъэмрэ шъолъыр парламентым зыкIыныгъэ хэлъэу къызэрэдыригъэштагъэмрэ Iофэу ыгъэцэкIагъэмкIэ анахь осэшIоу мэхъух.«Iоф зыщыпшIэгъэ илъэсхэм къакIоцI узипэщэ купым бэ зэшIуихыгъэр республикэм щыIэкIэшIу илъыным пае. Экономикэр нахь пытэ хъугъэ, хэхъоныгъэм иамалыкIэхэр нахь къэнэфагъэх, зекIоным нахь псынкIэу хэхъоныгъэ ышIыгъ. Ахэм адакIоу социальнэ пшъэрылъхэри зэшIохыгъэ хъугъэх: еджапIэхэр, сымэджэщхэр, гъогухэр ашIыгъэх. Анахь лъэныкъо шъхьаIэхэм зэхъокIыныгъэ инхэр афэхъугъ. Лъэхъэнэ гумэкIыгъоу къиныгъохэр къызщыкъокIыхэрэм о джыри зэ къэбгъэшъыпкъэжьыгъ шIуагъэ къытэу Iоф пшIэн зэрэплъэкIырэр, тапэкIи республикэм хэхъоныгъакIэхэр ышIынхэм унаIэ лъэшэу зэрэтебгъэтырэр», — къыIуагъ КъумпIыл Мурат.АР-м и ЛIышъхьэ къызэрэхигъэщыгъэмкIэ, Адыгеим исхэм Къэрэщэе-Щэрджэсым игъэхъагъэхэм лъытэныгъэшхо афашIы ыкIи къош лъэпкъым къыдэхъурэм агу къадеIэу кIэгушIух. КъумпIыл Мурат къызэриIуагъэмкIэ, республикитIур бэшIагъэ зызэдэлажьэрэр, зэфыщытыкIэшIухэр азыфагу зилъхэр. Ахэр илъэс къэс нахь мэпытэх, ежь ышъхьэкIэ Рашид Темрезовми иIахьышхо ащ хэлъ.Къэбэртэе-Бэлъкъарым и ЛIышъхьэу КIокIо Казбек, Ставрополь краим и Губернаторэу Владимир Владимировыр джащ фэдэу республикэм ипащэ къыфэлъэIуагъэх гъэхъэгъакIэхэр ышIынхэу.Рашид Темрезовым Iофтхьабзэм хэлэжьэгъэ пстэуми зэрафэразэр къыхигъэщыгъ ыкIи хэхъоныгъэм тегъэпсыхьагъэу Къэрэщэе-Щэрджэсыр ыпэкIэ зэрэлъыкIотэщтымкIэ къыгъэгугъагъэх. Урысыем и Правительствэ, хэбзэ къулыкъухэм яапшъэрэ лIыкIохэм, хэгъэгум иобщественнэ институтхэм, Урысые Федерацием ишъолъырхэм шIуагъэкъэзытырэ зэдэлэжьэныгъэ тапэкIи адыряIэн зэрэфаер анахьэу къыхигъэщыгъэхэм ащыщ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.