Тиорэд Грознэм щыIугъ

Адыгэ Республикэм изаслуженнэ артистэу, орэдыIоу Мышъэ Азидэ урысые ра­диофестивалым тишъолъыр къыщигъэлъэгъуагъ.

Я ХIV-рэ урысые радиофестивалэу «Кавказым ымакъ» зыфиIорэр Чэчэн Республикэм икъэлэ шъхьа-Iэу Грознэм щыкIуагъ. Республикэм иапэрэ Президентэу, Урысыем и ЛIыхъужъэу Ахмат Кадыровым ишIэжь фэгъэхьыгъэу ар зэхащагъ. Хэгъэгум ишъолъыр 63-мэ къарыкIыгъэ орэдыIохэр ащ хэлэ­жьагъэх.«Си Мурадин» зыфиIорэ орэдыр адыгабзэкIэ Мышъэ Азидэ фестивалым къыщиIуагъ.— Лъэпкъыбэ зыщыпсэурэ КавказымкIэ мыщ фэдэ Iоф­тхьабзэхэм язэхэщэн мэхьанэ­шхо иI. Ахэм бзэ зэфэшъхьаф яIэми, орэдым зэрепхых. Адыгеим культурэмкIэ и Министерствэ ыкIи Тэхъутэмыкъое районым культурэмкIэ игъэIорышIапIэ цыхьэ къысфашIи, фестивалым сызэрэхагъэлэжьагъэм лъэшэу сырэгушхо. Тикультурэ къизыIотыкIырэ адыгэ мэкъамэхэр тыди щызэхахынхэу сыфай, — къы­Iуагъ Мышъэ Азидэ.Тэхъутэмыкъуае дэт культурэм и Унэ щылэжьэрэ орэдыIо купэу «Къа­мылым» Мышъэ Азидэ иорэдыIу. 2016-рэ илъэсым телевизионнэ про­ектэу «Новая звезда» зыфиIорэм хэлэжьагъ. «Культурэм иIофышIэ анахь дэгъу-2021-рэ» зыфиIорэцIэр къылэжьыгъ. Тыркуем, Иорданием, Молдовэм ащыкIогъэ лъэпкъ культурэм имафэхэм ахэлэжьагъ. «Два сердца-близнеца», «Золотая пальма», «Улыбка мира», «Синяя птица» зыфиIорэ зэнэкъокъухэм текIоныгъэ къащыдихыгъ. «Абрэдж Нухь», «Си Мурадин», «Чъые, чъые цlыкlужъый», ыкIи нэмыкI адыгэ орэдхэр ирепертуар хэт. Творческэ гухэлъыбэ зыдиIыгъэу Мышъэ Азидэ адыгэ культурэм фэлажьэ, илъагъо дахэу щыпхырещы.ЛъэпшъыкъоФатим.