А. Балабась
Свято-Успенскэ чылысым къыпэIулъ общественнэ чIыпIэм изэтегъэпсыхьан лъагъэкIуатэ. Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытэгъэ федеральнэ проектэу «Къэлэ щыIэкIэ Iэрыфэгъум игъэпсын» диштэу мы проектыр пхыращы. Мыекъуапэ щыщ нэбгырэ мин 17-мэ амакъэ гъэрекIо мы чIыпIэм икъыхэхын пае атыгъагъ.
Джыдэдэм Свято-Успенскэ чылысым къыпэIулъ чIыпIэм чъыгхэр, куандэхэр, къэгъагъэхэр щыгъэтIысхьэгъэнхэмкIэ пэшIорыгъэшъ Iофтхьабзэхэр зэрахьэх. Проект шъхьаф — дендроплан ащ пае къагъэхьазырыгъ. Бжыхьэм чъыг 274-рэ мыщ щагъэтIысхьащт. Ахэм ащыщэу 100-р сэснэй, псэе чъыгых. Джащ фэдэу кондэ лъэгэ 410-рэ, нэмыкI кондэ лъэпкъ мини 9 фэдиз, псэе 228-рэ щагъэтIысхьанэу рахъухьэ. IофшIэнхэмкIэ IэпыIэгъу къафэхъу Iахьзэхэлъ обществэу «ОБД»-р.
Псы тыракIэзэ къагъэкIыщт газони мыщ щыгъэпсыгъэщт. Адыгеим и ЛIышъхьэу КъумпIыл Мурат пшъэрылъ зэрафишIыгъэм тетэу IофшIэнхэр мыщ щызэхащэх. ТапэкIэ къэлэ чIыпIэхэм язэтегъэпсыхьанкIэ ищыкIэгъэ IофшIэнхэр зэхащэнхэу ащ пшъэрылъ къыгъэуцугъагъ.Шъугу къэтэгъэкIыжьы мыгъатхэ чъыг, кондэ мини 3 фэдиз къалэм зэрэщагъэтIысхьагъэр.