Къэралыгъо автоинспекциер
КIэлэеджэкIо анахь цIыкIухэр лъэсрыкIо зэрэхъугъэхэмкIэ станицэу Джаджэм игурыт еджапIэу N 1-м щафэгушIуагъэх. Ащ епхыгъэ Iофтхьабзэр зэхащагъ Къэралыгъо автоинспекцием иотделэу Джэджэ районым щыIэм иIофышIэхэм.
Пшъэрылъ шъхьаIэу ащ иIагъэр апэрэ классым ихьагъэхэр гъогум телъ щыIэныгъэм хэгъэгъозэгъэнхэр ыкIи щынэгъончъэу ахэр ащ щызекIонхэмкIэ ищыкIэгъэ шIэныгъэхэр арагъэгъотынхэр ары. ЕджэкIо цIыкIухэмкIэ мыр мэхьанэ зиIэ егъэжьапI: лъэсрыкIо хъугъэхэу ежь-ежьырэу яунэ къикIэу еджапIэм екIурэ гъогур зэпачыщт.ДжэгукIэ шъуашэм илъэу полицейскэхэм кIэлэцIыкIухэр ягъусэхэу гъогу хьарыфылъэм ишапхъэхэр кIаджыкIыжьыгъэх: нэфрыгъуазэм ышъохэр къаIонхэр, машинэхэр зэрыкIохэрэ гъогур зэрэзэпачыщт шIыкIэр, лъэсрыкIо зэпырыкIыпIэм анаIэ зытырагъэтыщтыр, гъогу тамыгъэхэм ямэхьанэ.Джащ фэдэу анаIэ зытырагъэтыгъэхэм ащыщ нэфынэр къэзытырэ пкъыгъохэр ыкIи ныбалъэр агъэфедэнхэу зэрэщытыр. А пкъыгъохэм мэзэхэ уахътэм щынагъом цIыфыр зэрэщиухъумэрэр, водителым нахь зэрэхилъэгъукIыхэрэр еджэкIо цIыкIухэм нэрылъэгъу афашIыгъ.Iофтхьабзэм икIэухым апэрэ классым ихьагъэхэм зафагъазэзэ, дэгъоу еджэнхэу, шIэныгъэм екIурэ гъогу щынэгъончъэхэр яIэнхэу афэлъэIуагъэх. Ежь ныбжьыкIэ цIыкIухэми сакъыныгъэ къызхафэгъэнэу, шIокI имыIэу гъогурыкIоным ишапхъэхэр агъэцэкIэнхэу гущыIэ къатыгъ.