А. Гусев
Урысые Федерацием и Къэралыгъо Думэ идепутатхэм яхэдзынхэр тыгъуасэ аублагъ. Ащ дакIоу Адыгэ Республикэм и Къэралыгъо Совет — Хасэм идепутатхэр, джащ фэдэу Теуцожь, Красногвардейскэ ыкIи Джэджэ районхэм ащыIэ чIыпIэ зыгъэIорышIэжьын къулыкъухэм ялIыкIохэр хадзыщтых. ПстэумкIи хэдзыпIэ 266-рэ шъолъырым къыщызэIуахыгъ.
Урысые Федерацием и Къэралыгъо Думэ идепутат 450-рэ цIыфхэм хадзыщт: 225-р — партийнэ спискэхэмкIэ, адрэ 225-р — зы мандат зиIэ хэдзыпIэ койхэмкIэ. Адыгеим хэдзынхэмкIэ зы мандат зиIэ икоеу N 1-м Къэралыгъо Думэм идепутат хъунымкIэ кандидати 7-мэ зыкъыщагъэлъэгъуагъ. Хэдзын кампанием политическэ партии 10 хэлажьэ.Адыгэ Республикэм и Къэралыгъо Совет — Хасэм идепутат 50 хадзыщт: 25-р — партийнэ спискэхэмкIэ, адрэ 25-р — зы мандат зиIэ хэдзыпIэ койхэмкIэ. Адыгеим и Парламент идепутат хъунхэмкIэ зыкI хэдзыпIэ коим кандидат 383-рэ, зы мандат зиIэ коимкIэ 102-рэ ащатхыгъ. Шъолъыр хэдзынхэм политическэ партии 6 ахэлажьэ.
Адыгэ Республикэм и ЛIышъхьэу КъумпIыл Мурат хэдзыпIэу N 142-м тыгъуасэ ымакъэ щитыгъ. Федеральнэ инспектор шъхьаIэу Сергей Дрокиныр мы чIыпIэм щыхэдагъ.Адыгеим и ЛIышъхьэ къэбар жъугъэм иамалхэм яIофышIэхэм адэгущыIэзэ, Урысые Федерацием и Къэралыгъо Думэрэ Адыгэ Республикэм и Къэралыгъо Совет — Хасэрэ ахэтыщтхэр зэрэхадзыхэрэр мэхьанэшхо зиIэ политическэ хъугъэ-шIагъэу зэрэщытыр къыхигъэщыгъ. Тикъэралыгъорэ республикэмрэ илъэситфым къыкIоцI хэхъоныгъэу ашIыщтыр ащ зэрелъытыгъэр къыIуагъ.
Шапхъэу щыIэхэм адиштэу республикэм ихэдзыпIэхэр пчэдыжьым сыхьатыр 8-м Урысыем ыкIи Адыгеим ягимнхэр къырагъаIозэ къызэIуахыгъэх. Мыекъуапэ Iоф щызышIэхэрэм ащыщэу N 156-м текIолIагъ. Ащ ипащэу Оксана Пономаренкэм къызэрэтиIуагъэмкIэ, апэрэ такъикъхэм нэбгырипшI фэдизмэ амакъэ атыгъ.— ЗэкIэмкIи хэдзынхэм ахэлэжьэнхэу фитыныгъэ зиIэ нэбгырэ 1370-рэ ттхыгъэ. Мыщ къекIуалIэхэрэм анэмыкIэу унэм зымакъэ щызыты зышIоигъоу зязыгъэтхыгъэхэм адэжь кIуагъэх. Ахэм янахьы- бэр пенсионерых, сэкъатныгъэ зиIэх ыкIи сабый цIыкIу зыпылъых. КъытэолIагъэхэм бэу ахэтых зыныбжь хэкIотагъэхэр, ау ныбжьыкIэхэри макIэп. Якъэралыгъо къырыкIощтым ахэр егъэгумэкIых. Анахь ныбжьыкIэм илъэс 20 ыныбжь. Нэбгыри 5 фэдиз апэрэу хэдзынхэм ахэлэжьэщтых, ахэм шIухьафтынхэр афэдгъэхьазырыгъ, — къыIуагъ Оксана Пономаренкэм.
Комиссием хэтхэм анэмыкIэу общественнэ лъыплъакIохэр ыкIи партие зэфэшъхьафхэм ялIыкIохэр мыщ чIэтых. Шапхъэхэм адиштэу, хэбзэгъэуцугъэм тетэу хэдзынхэр зэхащэнхэм ахэм анаIэ тет.Надежда Виноградовар апэрэп лъыплъакIоу хэдзынхэм захэлажьэрэр. Мыгъэ цIыфхэр нахьыбэу къызэрекIуалIэхэрэр ащ къыхигъэщыгъ. Сыхьатыр блым ыныкъом хэдзыпIэм къекIолIагъ, ар къызызэIуахыгъэм щегъэжьагъэу шапхъэхэр зэрагъэцакIэхэрэм лъэплъэ. Мэфищрэ ипшъэрылъхэр ыгъэцэкIэщтых.Адыгеим и Общественнэ палатэ зэкIэмкIи общественнэ лъыплъэкIо 700 ыгъэхьазырыгъ. ХэдзыпIэхэм амакъэ зэращатырэр зэпымыоу видеолъыплъэным къегъэлъагъо.Партиехэм ащыщ илIыкIо къызэриIуагъэмкIэ, хэдзынхэр зэрифэшъуашэу макIо, зэпыу имыIэу ощхыми къымыгъэуцухэу цIыфхэр къэкIох.
— Сипшъэрылъ дэгъоу къызгурэIо, хэдзынхэм ренэу сахэлажьэ. Адыгеим ыкIи Урысыем хэхъоныгъэ ашIыным, тищыIэкIэ-псэукIэ нахьышIу хъуным, тицIыфхэр мамырэу щыIэнхэм апае нэбгырэ пэпчъ ымакъэ ытын фае, — къыIуагъ Илерия Лампарадзе.Мэфищым къыкIоцI цIыфхэм амакъэ атын алъэкIыщт. Адыгэ Республикэм хэдзынхэмкIэ и Гупчэ комиссие зэригъэнэфагъэм тетэу мэкъэтыныр рагъэжьагъ, тыгъуасэ сыхьатыр 3-м ехъулIэу шапхъэхэр аукъуагъэу къыхагъэщыгъэп.ДЕЛЭКЪО Анет.