Тилъэпкъэгъу ныбжьыкIэхэр Адыгеим ихьакIагъэх

Тыркуем щыпсэурэ тилъэпкъэгъу ныбжьыкIэ 22-рэ хъурэр Адыгеим ихьакIагъэх. Ахэр Iоныгъом и 14 — 16-м Къэбэртэе-Бэлъкъарым щыIагъэх. Ащ къыкIэлъыкIорэ мэфитIум Мыекъуапэ ичIыпIэ дахэхэр къаплъыхьагъэх, зэдэгущыIэгъухэм, нэмыкI Iофтхьабзэхэм ахэлэжьагъэх. «Адыгэ макъэр» купым АР-м и Лъэпкъ музей щыIукIагъ.

Апэрэ мафэм ныбжьыкIэ купыр Адыгэ Хасэм рагъэблэгъагъ. Ащ хэлэжьагъэх Урысыем IэкIыб къэрал IофхэмкIэ и Министерствэ илIыкIоу Игорь Терзиян, АР-м лъэпкъ IофхэмкIэ, IэкIыб къэ­ралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт, Адыгеим ис лъэпкъхэм я Унэ ипащэу Шъхьэлэхъо Аскэр, Адыгэ Хасэм ыкIи ащ иныбжьыкIэ къу­тамэ хэтхэр.— Кавказ лъэпкъхэм я Ассоциациеу Тыркуем щыIэм (КАФФЕД-м) зэпхыныгъэ дытиI. Ащ иныбжьыкIэ куп мы мафэхэм тихьакI. Мыщ хэтхэр лъэпкъ дипломатием Тыркуем щыфырагъаджэх. Ащ къыдыхэлъытагъэу зэрысхэ къэралыгъом щыхъурэ Iофхэм ныбжьыкIэхэр нэIуасэ афашIых, нэужым чIыпIэ зэфэшъхьафхэм практикэ щарагъэхьы, пащэ хъунхэм фагъэхьазырых. Iофтхьабзэхэм къащыхэщыгъэхэр шIухьафтын фэдэу чIыгужъым къагъэкIуа­гъэх. ТиныбжьыкIэхэр зэхэт­щэнхэр, шэн-хэбзэ зэхэтыкIэхэр къафэтIотэнхэр ыкIи ячIыгужъ зыфэдэр ядгъэлъэгъуныр ти­пшъэрылъ, — къыIуагъ Адыгэ Республикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан.ХьакIэхэм тарихъ хэкум ищыIэкIэ-псэукIэ, икультурэ, ихабзэхэм защагъэгъо­загъ. Нэужым музейхэр ыкIи Мыекъуа­пэ ичIыпIэ дахэхэр къаплъыхьагъэх.Купым ипащэу Мамрэщ Умарэ къызэрэхигъэщыгъэмкIэ, КАФФЕД-м иныбжьыкIэ 40 фэдиз Тыркуем ихэбзэкъулыкъушIэхэм рагъаджэх. Ахэм анахь чанхэр Къэбэртэе-Бэлъкъарым ыкIи Адыгеим къагъэкIуагъэх.

— Пшъэрылъ шъхьаIэу тиIэр ныбжьыкIэхэр общественнэ щыIакIэм хэтщэнхэр ыкIи тапэкIэ къэралыгъом ипэрыт хъунхэм фэшI егъэджэгъэнхэр ары. КАФФЕД-м иустав итхагъ: «Тынэгу хэкум фэгъэзагъэу», мы гущыIэхэм тарыгъуазэзэ, тиныбжьыкIэхэр хэкум фэщэгъэнхэм ыуж тит. Ар къыддэзгъэ­хъущтыр нахьыбэрэ тызэхэхьаныр ары. Культурэр, тарихъыр, тичIыопс идэхагъэ зэрагъашIэ, лъэныкъуитIум яныбжьыкIэхэм зэпхыныгъэу зэдыряIэр нахь агъэ­пытэ, — хигъэунэфыкIыгъ Мамрэщ Умарэ.НыбжьыкIэхэр Къэбэртэе-Бэлъкъарым зэкIохэм Дунэе Адыгэ Хасэм итхьаматэу Сэхъурэкъо Хьаути IукIагъэх. Ассоциацием иIофшIэн илъэныкъо шъхьаIэхэр ащ къафиIотагъ.Мамрэщ Умар къызэриIуагъэмкIэ, республикитIум щалъэгъугъэр, щызэхахы­гъэр лъэшэу ашIогъэшIэгъоныгъ. ЗэрэщыIэгъэхэ уахътэр ашIомакIэу, тапэкIэ яунагъохэр ягъусэхэу джыри къэкIонхэ мурад яIэу ягъогу техьажьыгъэх.IЭШЪЫНЭ Сусан.