Лъэпшъыкъо Ф.
Даур Руслъан кином, сурэттехыным ыкIи сурэтшIыным зэрафэIазэм дакIоу адыгэ-абхъаз бзэ купыр къызэлъызыубытырэ зыкI хьарыфылъэ зэхигъэуцуагъ.
Ащ фытегъэпсыхьэгъэ творческэ зэIукIэгъу АР-м и Лъэпкъ тхылъеджапIэ щыкIуагъ. «Черкесская каллиграфия» зыфиIорэ тхылъым илъэтегъэуцо зэхащагъ. Iофтхьабзэм хэлэжьэгъэ шIэныгъэлэжьхэм IэпэIасэм итхыгъэ еплъыкIэу фыряIэр къыраIотыкIыгъ.Творческэ зэIукIэр псэлъэ фабэкIэ къызэIуихыгъ Лъэпкъ тхылъеджапIэм иIофышIэ шъхьаIэу Кучмэз Аминэт.Даур Руслъан Шъачэ щыкIогъэ экономическэ форумым къыщигъэлъэгъогъэ инвестиционнэ проектэу «Черкесский сад» зыфиIорэм къыдыхэлъытагъ лъэпкъ кинематографиемрэ зекIонымрэ хэхъоныгъэ ягъэшIыгъэным иамалхэр.— «Черкесская каллиграфия» зыфиIорэ тхылъым илъэс 40-рэ сыдэлэжьагъ. Джыри сыстудентызэ къыздеджэрэ грузин кIалэм ижъырэ грузин хьарыфылъэу ыIыгъыр сшIогъэшIэгъон хъугъэ ыкIи тэ тиадыгэ хьарыфылъэ ижъырэ ижъыкIэ къыщыублагъэу зэзгъэшIэнэу ыкIи стхынэу сыублагъ. Къыхэзгъэщымэ сшIоигъу, мыр адыгэ хьарыфылъакIэу щытэп. Ижъырэ адыгэ лъэпкъ тамыгъэхэр зыщыгъэфедэгъэ мифоэпическэ хьарыфылъ. Ащ дэIэпыIэрэ гущыIалъи къыдэзгъэкIыгъ. Хьарыфхэм ятхын ямышIыкIэ художественнэ екIолIакIэ фэсшIыгъ. Адыгабзэр къэзыухъумэщтхэр къыткIэхъухьэрэ ныбжьыкIэхэр ары. Арышъ, ахэм ныдэлъфыбзэр шIу алъэгъоу, ягупшысэхэр къыраIотыкIынхэ алъэкIыным фэгъэсэгъэнхэр «Черкесский сад» зыфиIорэ проектым къыдыхэлъытагъ, — къыIуагъ Даур Руслъан.
Iофтхьабзэм цIыфыбэ къекIолIагъ — Адыгэ къэралыгъо ыкIи Мыекъопэ къэралыгъо технологическэ университетхэм, гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм яшIэныгъэлэжьхэр, кIэлэегъаджэхэр, студентхэр, тхылъеджапIэм иIофышIэхэр.ЩыIэныгъэм ылъапсэр шIэныгъэр арэу зэрэщытыр къыгурыIоу зэрэлажьэрэр шIукIэ авторым фалъэгъугъ. ЯмышIыкIэ хьарыфхэм непэрэ мафэм хэуцонхэу чIыпIэ агъотыщтмэ къезгъэкIугъэхэри, тIэкIу дезымыгъэштагъэхэри зэхахьэм къекIолIагъэхэм къахэкIыгъэх.Дунаим тет цIыф лъэпкъхэр зэхэзыушъхьафыкIыхэрэр бзэр ары. Лъэхъэнэ гъэнэфагъэм дунэееплъыкIэу, адыгэхэм зэхашIэу яIагъэр, шIэныгъэу зэрыгъуазэщтыгъэхэр лIэшIэгъухэм къапкъырыкIыгъ, къаухъумагъ, адыгэ хьарыфылъэри зэтеуцуагъ. Неущрэ мафэр лъызгъэкIотэщт ныбжьыкIэхэм адыгабзэр ашIэным, рыгущыIэнхэм дэлэжьэгъэныр пшъэрылъ ин.ЛъэпшъыкъоФатим.