ФутболымкIэ Адыгэ Республикэм и Къэралыгъо Совет — Хасэм ишIухьафтын зэрылъ Кубокым икъыдэхын фэгъэхьыгъэ зэнэкъокъум ифиналныкъо ихьагъэхэр мы мафэхэм къэнэфагъэх.
Апэу ешIапIэм къихьагъэх Теуцожь районым икомандэрэ Мыекъуапэ къэзыгъэлъэгъорэ «Ансарымрэ». ЗэIукIэгъур гъэшIэгъонэу, узIэпищэу кIуагъэ. Теуцожь районым ифутболистхэм 2:0-у текIоныгъэр къыдахыгъ ыкIи ыпэкIэ лъыкIотагъэх.Ащ ыуж Мыекъопэ районым икомандэу «Урожаимрэ» «Креативымрэ» зэдешIагъэх. «Урожаир» лъэшэу джэгугъэ, 5:1-у зэIукIэгъур къыхьыгъ. «Кавказ-Адэмыер» (Красногвардейскэ район) къуаджэу Мэфэхьаблэ икомандэу «Саусэрыкъом» IукIагъ. Красногвардейцэхэр хэпшIыкIэу нахь лъэшыгъэх, 22:1-у текIоныгъэр къыдахыгъ. Мы пчъагъэр зэнэкъокъум ирекордыкIэ хъугъэ. Аужырэ ешIэгъум «Адыгэкъалэрэ» «Аргомрэ» щызэIукIагъэх. Къутырэу Гавердовскэм илIыкIохэм алъэкI къагъэнагъэп, я 88-рэ такъикъым пчъагъэр зэфэдиз ашIын алъэкIыгъ. Ау «Адыгэкъалэ» хэт Уджыхъу Рэмэзан къэлапчъэм Iэгуаор дидзи, 2:1-у текIоныгъэр икомандэ къыфихьыгъ.
Финалныкъом къыдыхэлъытэгъэ ешIэгъухэр Iоныгъом и 26 – 27-м стадионэу «Юностым» щыкIощтых. Теуцожь районыр «Урожаим», «Кавказ-Адэмыер» «Адыгэкъалэ» адешIэщтых. ЗэIукIэгъуитIури мафэм сыхьатыр 4-м рагъэжьэщтых.