Адыгэ Республикэм и Мафэ фэгъэхьыгъэ республикэ Спартакиадэу «Будь здоров» зыфиIорэр Мыекъуапэ щыкIуагъ. Мыщ зыныбжь хэкIотагъэхэр хэлэжьагъэх.
Iофтхьабзэм къыдыхэлъытагъэу шышъхьэIум муниципалитетхэм зэкIэми хэшыпыкIын едзыгъохэр ащыкIуагъэх, ахэм нэбгырэ 302-рэ ахэлэжьагъ. Кощхьэблэ районым икоманд ары анахьыбэ зыхэтыгъэр – лIыкIо 61-рэ. Спортсмен анахьыжъхэм гурытымкIэ илъэс 80 аныбжь. КIэух едзыгъом нэбгыри 150-рэ хэфагъ. Ахэр есынымкIэ, атлетикэ псынкIэм иэстафетэкIэ, теннис цIыкIумкIэ, атлетикэ псынкIэмкIэ, шахматхэмкIэ, щэ щэрыонымкIэ, дартсымкIэ, волейболымкIэ ыкIи футбол цIыкIумкIэ зэнэкъокъугъэх.Командэхэм язэнэкъокъу пэрытныгъэр щиубытыгъ республикэм икъэлэ шъхьаIэ. Тэхъутэмыкъое районым ятIонэрэ, Мыекъопэ районым ящэнэрэ чIыпIэхэр къыдахыгъэх. ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм кубокхэр, медальхэр, дипломхэр ыкIи шIухьафтынхэр афагъэшъошагъэх.Спорт къэгъэлъэгъонхэм адакIоу, творчествэм ылъэныкъокIи анахь дэгъухэр зэхэщакIохэм къыхагъэщыгъэх.Iофтхьабзэм кIэщакIо фэхъугъ Адыгеим IофшIэнымкIэ ыкIи социальнэ хэхъоныгъэмкIэ и Министерствэ. Ащ иIэпыIэгъугъэх АР-м физическэ культурэмрэ спортымрэкIэ и Комитет, «Урысыем ипенсионерхэм я Союз» зыфиIорэм и Адыгэ шъолъыр къутамэ.Зэнэкъокъум изэфэхьысыжьхэмкIэ спортсмен анахь лъэшхэр Адыгэ Республикэм ихэшыпыкIыгъэ командэ хэхьащтых. 2027-рэ илъэсым Москва щызэхащэщт Урысые Спартакиадэм тишъолъыр ахэм къыщагъэлъэгъощт. Тиветеранхэм гъэхъагъэхэр зэрашIыщтхэм щэч хэлъэп.