Адыгэкъалэ ибжьэхъо ныбжьыкIэхэм ятекIоныгъ

Бжьэхъуным пылъ Зубаил Аслъанрэ Фатимэрэ ясабыйхэу Сумайе, Исмахьилэ ыкIи Иляс Пшызэ къэралыгъо университетым иботаническэ чъыгхатэ щыкIогъэ Дунэе зэнэкъокъоу «Бжьэр ыкIи цIыфыр. Сабыйхэр» зыфиIорэм ихэхын уцугъо я III-рэ шъуашэ зиIэ диплом къыщахьи, зэнэкъокъум иаужырэ уцугъоу Москва щыкIуагъэм хэлэжьэнхэу хъугъэ.

Къыблэ федеральнэ шъолъырыр Адыгеим икIыгъэ унагъом зэрифэшъуашэу къыгъэлъэгъуагъ. «Кавказянки FI» зыфаусыгъэ купым бжьэхъунымкIэ шIэныгъэ дэгъухэр зэриIэр къыушыхьатыгъ. Якъалэ, яреспубликэ ацIэ чыжьэу агъэ­Iугъ.Бжьэхэр зикIэсэ ныбжьыкIэхэр мы зэнэкъокъум зэрипхыгъэх. Мыгъэ ар ятIонэрэу зэхащэ. Хэгъэгум ишъолъыр зэфэшъхьафхэм, джащ фэдэу Респуб­ликэу Беларусь къарыкIыгъэхэр ащ хэлэжьагъэх.Зэфэхьысыжьэу зэнэкъокъум фэхъугъэмкIэ, купэу «Кавказянки FI» зыфиIорэм текIоныгъэ къыдихыгъ. Зэнэкъо­къум къыдыхэлъытагъэу бжьэхэм япхыгъэ шIэныгъэу ныбжьыкIэхэм яIэр ауплъэкIугъ, бжьэхэр пIыгъыным пае Iэмэ-псымэу бгъэфедэн фаехэр, шъоу нахь къэзытырэ къэкIыхэрэр, шъоур зэрэзэтефыгъэр ыкIи нэмыкI упчIэхэр къаратыгъ.

Адыгэ кIэлэцIыкIухэм IэпэIэсэныгъэшхо зэрахэлъыр къагъэшъыпкъэжьыгъ. ГущыIэм пае, бжьэхэм уахэхьаным пае хэушъхьафыкIыгъэ щыгъыныр нахь шIэхэу зыщызылъэщтхэр зауплъэкIум, Сумайе нэгъэупIэпIэгъуи 6-кIэ зифэ­пагъ, анахь гъэхъэгъэ гъунапкъэу щыIагъэр 15. Нэужым шъуашэхэр ащыгъхэу бжьэматэхэм яфэIо-фашIэхэр агъэцэкIагъэх.Сумайе, Исмахьилэ ыкIи Иляс ятэ игъусэхэу бжьэхъуным зэрэпылъхэм ишIогъэшхо къэкIуагъ. Мыщ ишъэфхэр зэкIэ дэгъоу ашIэу къычIэкIыгъ. Зэнэкъо­къум зэрэхэлэжьагъэхэр ягуапэу кIэлэцIыкIухэм къаIуатэ.— Шъолъыр зэфэшъхьафхэм къарыкIыгъэхэм нэIуасэ тафэхъуныр тшIогъэ­шIэгъоныгъ. БжьэхъунымкIэ шIэныгъэу тиIэхэмкIэ тызэдэгощагъ. Зэнэкъокъум ипэублэ лъэшэу тыгумэкIыщтыгъ, ау тызэрэзэкъотым ишIуагъэ къытэкIыгъ, текIоныгъэ къыдэтхыгъ. Зэфэхьысыжьхэм лъэшэу тагъэгушIуагъ ыкIи тагъэгу­шхуагъ, — аIо бжьэхъо ныбжьыкIэхэм.Зубаилхэм якIэлэцIыкIухэр Москва зэрэщыIагъэхэр джыри агу икIыжьырэп. Зэнэкъокъум имызакъоу, зэхэщакIохэм Iофтхьэбзэ зэфэшъхьафхэр къафагъэхьазырыгъ. Циркэу зыдэщыIагъэхэр лъэшэу агу рихьыгъ. Джащ фэдэу цIыф цIэры­Iохэм аIуагъэкIагъэх.АслъанкIэ исабыйхэм текIоныгъэ къызэрэдахыгъэм мэхьанэ иI. Зэнэкъо­къур мэкIофэ ар ягъусагъ, шIэныгъэ дэгъухэр къызэрагъэлъэгъуагъэмкIэ ар афэраз. Унэгъо хъызмэтым игъэзекIон мы гъэхъагъэр къызэрэкIэкIуагъэр къы­хигъэщыгъ.— Сабыйхэм зэрашIогъэшIэгъонымкIэ сэгушIо. Бжьэхъуныр къызэрыкIоу щытэп, щэIэгъэшхо пхэлъын фае, пшъэдэкIыжь ин пылъ. Мафэ къэс ахэр сигъусэхэу IофшIэнхэр зэшIотэхых, мы лъэныкъом гухахъо хагъуатэ. Бжьэхъуным зыкъегъэIэтыгъэным пае мыщ фэдэ зэнэкъо­къухэм мэхьанэ яIэу сэлъытэ. Тиунагъо зэрэхэлэжьагъэм, текIоныгъэ къызэрэдихыгъэм тырэгушхо. Ежьхэм яшIэныгъэхэр къагъэлъэгъогъэ къодыеп, нэмыкI­хэми яплъыгъэх ыкIи лъэныкъуакIэхэр зэрагъэшIагъэу тыкъэкIожьыгъ, — еIо Аслъан.Зубаилхэм яунагъо сабыих щапIу, ахэр зэкIэ а Iофтхьабзэм хэлэжьэнхэу шIэныгъэ яIагъ, ау зэнэкъокъум ишапхъэхэмкIэ купым нэбгырищ ныIэп хэтынэу щытыгъэр.Аслъан илъэсиблыкIэ узэкIэIэбэжьмэ бжьэхъуным фежьэгъагъ. ЫпэкIэ шъоу къыщэфыти, ыщэжьыщтыгъ. ЩэфакIохэм упчIэхэр бэу къыраты зэхъум, мы лъэныкъор нахь игъэкIотыгъэу зэригъэшIэнэу фежьагъ. Зы бжьэматэ зэригъэ­гъотыгъ, бэ темышIэу ар бэгъуагъэ, плIы хъугъэ, мэкIэ-макIэу зыпищагъ. Непэ бжьэмэтэ 40-м нигъэсыгъ. ЧIыпIэ икъу фэдизэу зэримыIэм къыхэкIыкIэ нахьыбэ ышIырэп, къелыекIырэ бжьэхэр ещэх. Бжьэхъуныр нахь игъэкIотыгъэу зэригъэшIэным пае Пшызэ къэралыгъо университетым бжьэхъуным епхыгъэ сэнэхьат зэригъэгъотынэу чIэхьагъ, я 4-рэ курсым щеджэ.Зубаилхэм шъоу лъэпкъ зэфэшъхьафыбэ кIащы, щэфакIохэр бэу яIэх. Мы лъэныкъор шэпхъэшIухэм адиштэу ыгъэ­псыным пае къэралыгъо IэпыIэгъоу щыIэхэм бысымыр акIэупчIэ, къыдэхъу­нэу мэгугъэ.АдыгэкъалэкIэ мы унагъор щысэте­хыпI пIоми ухэукъощтэп. ЗэгурыIожьхэу ясабыйхэр апIух, ахэр яцIыкIугъом къыщегъэжьагъэу унэгъо хъызмэтым фащэх. Бжьэхъуным имызакъоу, нэмыкI лъэныкъохэми апылъых. Ащ нэмыкIэу социальнэ зэзэгъыныгъэр къызфагъэфедагъэу шъошэ зэфэшъхьафхэр Аслъан ышыпхъоу Малайчэтрэ ишъхьэгъусэу Фатимэрэ адых, пшъэшъэжъыехэри дэным фэщагъэ хъугъэхэу адэIэпыIэх.Мы унагъом джыри зэ къыушыхьа­тыгъ уишъыпкъэу узыпылъ Iофым гъэхъагъэ­хэр къызэрэкIэкIощтыр. Адыгэкъалэ ибжьэхъо ныбжьыкIэ цIыкIухэр ащ къы­щыуцущтхэп, яшIэныгъэхэм ахагъэхъощт, ацIэ чыжьэу агъэIущт. ДЕЛЭКЪО Анет.