Шъолъыр фондэу «Хэгъэгум иухъумакIохэр»
Джэджэ районым истаницэу Дондуковскэм щыщ хэушъхьафыкIыгъэ дзэ операцием иветеранэу Виталий Кондратенкэм мамыр щыIакIэм къызэрэфигъэзэжьыгъэр ищыIэныгъэ едзыгъуакIэ фэхъугъ. Ащ щытхъу хэлъэу идзэ пшъэрылъ ыгъэцэкIагъ, ЛIыхъужъныгъэм иорден къыфагъэшъошагъ, 2025-рэ илъэсым ипсауныгъэ изытет елъытыгъэу ар иунэ къэкIожьыгъ.
Ишъхьэгъусэрэ ежьыррэ мэкъумэщ хъызмэтым зыкъыщыхагъотэн ыкIи яунэе Iоф къызэIуахынэу рахъухьагъ. Виталий федеральнэ проектэу «Фермерым иеджапIэ» хэлэжьагъ ыкIи лъэныкъоу «Пхъэшъхьэ-мышъхьэ – цумпэ лъэпкъхэм якъэгъэкIын» зыфиIорэр къыхихыгъ. Ветераныр еджэфэ къэралыгъо шъуашэ зиIэ диплом къызэрэратыгъэм имызакъоу, ичIыгу Iахь щигъэфедэнэу ыгъэнафэрэмкIэ шIэныгъэхэри зэригъэгъотыгъ.— Нэшэбэгум, помидорым, шхынхалъхьэхэм якъэгъэкIын сыфежьэ сшIоигъу. Ащ пае гъэфэбапIэ сшIыщт. ХэушъхьафыкIыгъэ дзэ операцием иветеранэу сызэрэщытым пае чIыгу Iахь къысатыгъ. Ащ имызакъоу, сыздэс щагуми хатэ дэлъ. Арышъ, сатыушIыныр езгъэжьэным фэшI икъун чIыпIэ сиI. ТапэкIэ къэралыгъо IэпыIэгъоу щыIэхэр къызфэзгъэфедэнхэ ыкIи программэу «Агромотиваторым» сыхэлэжьэн гухэлъ сиI, — игупшысэхэмкIэ къыддэгощагъ Виталий.ТапэкIэ джы ветераным гъэфэбапIэхэр ыгъэпсыщтых, апэрэ лъапсэхэр ыгъэтIысхьащтых ыкIи ащкIэ иунэе хъызмэтшIапIэ зыригъэушъомбгъущт. Ар зэрыкIощт гъогум ицыхьэ телъынымкIэ IэпыIэгъу къыфэхъущт «Фермерым иеджапIэ» щигъотыгъэ шIэныгъэр.2026-рэ илъэсым зигугъу къэтшIырэ программэм хэушъхьафыкIыгъэ дзэ операцием иветеранхэм ыкIи ахэм яунагъохэм арыс нэбгырэ 16 хэлэжьагъ. ЩыIэныгъэм зыкъыхагъотэнымкIэ, ашIоигъо лъэныкъом зыфагъэзэнышъ, хэхъоныгъэ ашIынымкIэ нэбгырабэхэм ар амалышIу афэхъу.«Фермерым иеджапIэ» ибжыхьэ едзыгъо чъэпыогъум и 5-м рагъэжьэщт, лъэIу тхылъхэм яштэн мы уахътэм макIо.Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ программэм ухэлэжьэным пылъ шапхъэхэр, тхылъэу бгъэхьазырыщтхэр ыкIи зэхэфынхэр дзэ операцием иветеранхэм, ахэм яунагъохэм афызэхещэх, ящыкIэгъэ IэпыIэгъур арегъэгъоты.ИгъэкIотыгъэ къэбарыр шъолъыр фондым къыщышъуфаIотэщт е телефонэу 8 (8772) 53-12-54-м шъутеон шъулъэкIыщт.IЭШЪЫНЭ Сусан.