Гъэстыныпхъэ шхъуантIэр аратыгъ

Мыекъопэ районым ит поселкэу Спокойнэм гъэстыныпхъэ шхъуантIэм икIуапIэу щагъэпсыгъэр джырэблагъэ атIупщыгъ.

Ащ фэгъэхьыгъэ Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, ащ игуадзэу Цэй Эдуард, Iахьзэхэлъ обществэу «Газпром газораспределение Майкоп» ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIохэрэм япащэу ЕкъутэкI Аслъан, Мыекъопэ район администрацием ипащэу Михаил Марьиныр, нэмыкI— хэр.«Поселкэу Спокойнэм щыпсэурэ унагъохэм ащыщхэм гъэстыныпхъэ шхъуантIэр аIэкIахьэ хъугъэ. ПсэупIэм дэсхэм щыIэкIэ амалэу яIэр нахьышIу шIыгъэнымкIэ газым мэхьанэшхо иI. «Догазификацием» фэгъэхьыгъэ программэм къызэрэщыдэлъытагъэу, Адыгеим щыпсэухэрэм гъэстыныпхъэ шхъуантIэр аIэкIэгъэхьэгъэнымкIэ IофшIэнхэр тапэкIи лъыдгъэкIотэщтых», — къыхигъэщыгъ ЕкъутэкI Аслъан.Гъэстыныпхъэ шхъуантIэр зэбгырызытIупщырэ станциеу поселкэу Краснооктябрьскэм дэтым хащыгъэ рыкIуапIэу Спокойнэм екIурэр километри 2,8-рэ мэхъу. УФ-м и Президентэу Владимир Путиным иунашъокIэ пхыращырэ программэу цIыфхэм гъэстыныпхъэ шхъуан­тIэр аIэкIэгъэхьэгъэным фэгъэхьыгъэм къыщыдэлъытагъэу ар ашIыгъ. Ежь псэупIэм щызэбгыращыгъэр километрэрэ метрэ 800-рэ мэхъу, унэ 20 епхыгъэным фытегъэпсыхьагъ.Президентыр кIэщакIо зыфэхъугъэ программэу «догазификацием» фэгъэ­хьыгъэм хэлажьэзэ гъэстыныпхъэ шхъуан­тIэр иунэ езыщалIэ зышIоигъохэм ялъэIу тхылъ мин 15-м ехъу Адыгеим пстэумкIи къыщатыгъ. Мы уахътэм зищагу гъунапкъэ ращэлIагъэр мин 14 мэхъу. Ахэм ащыщэу мини 9-м ехъумэ гъэстыныпхъэ шхъуантIэр афатIупщы­гъах.