ШIушIэ Гупчэм имэфэкI

ЦIыфэу IэпыIэгъу зищыкIагъэхэм ар языгъэгъотырэ Гупчэу «Важные вещи» зыфиIорэр къызызэIуахыгъэр илъэс хъугъэ. Ау мыщ щылажьэхэрэм шIур зэрахьанэу зырагъэжьагъэр илъэси 3,5-кIэ узэкIэIэбэжьмэ ары.

— Гъэфедэгъэ щыгъынхэр къыдэгъэ­кIыжьыным арагъэхьы хабзэ. Ау цIыфхэм яптымэ шIуагъэ нахь иIэщтэу тегупшысагъ. Сэщ фэдэу шIу зышIэ зышIоигъо сипшъэшъэгъухэр сигъусэхэу сиунэ щыгъынхэр щытыугъоинэу едгъэжьэ­гъагъ. КъырахьылIэхэрэр зэхэтшыпыкIыти, ахэм афэныкъохэм яттыщтыгъ. ИлъэсныкъокIэ тонниплIым кIахьэу щыгъын тыугъоигъ. Унэм тимыфэжьэу гъэтIылъыпIэ бэджэндэу тштэн фае хъугъагъэ,— къеIуатэ Гупчэм ипащэу Ирина Дербеневам.ШIушIэ купэу зэхэхьагъэм Iофэу ригъэжьагъэм аущтэу псынкIэу мэхьанэшхо иIэ хъущтми ашIагъэп.— Ащ фэдизэу цIыфышIу бэдэдэ республикэм щэпсэуми сшIагъэп. ЕтIани, ежьхэм щыгъынхэр къытатыжьхэ зыхъукIэ, «тхьашъуегъэпсэу» къытаIо. Тэры ахэм афэрэзэнэу щытыр. Мы гупчэм зиушъомбгъунымкIэ къэралыгъо IэпыIэгъу дгъотыгъэ. «Мэхьанэ зиIэ пкъыгъохэм яуахът» зыфиIорэ проектыр УФ-м и Президент игрантхэм я Фонд ишIуагъэкIэ дгъэцэкIагъэ. Гупчэр джы зычIэт унэр Мыекъопэ администрацием къытитыгъ, игъэкIотыгъэ гъэцэкIэжьын етшIылIэнэу зетэгъажьэми къыддэмыIэпыIагъэ къахэкIыгъэп. Мары ахэм ацIэ­хэр зэкIэ дэпкъым тетхагъэх, — афэразэу къеIо Иринэ.Щыгъынхэм яугъоин ыкIи ягощын фэгъэхьыгъэ проектыкIэу «Мэхьанэшхо зиIэ Гупчэр» зыцIэр Адыгэ Республикэм игранткIэ джырэ уахътэм агъэцакIэ.— АР-м и ЛIышъхьэу КъумпIыл Мурат иунашъокIэ мыщ фэдэ гупчэхэм зэрэтфэлъэкIэу тишIуагъэ ятэгъэкIы. АщкIэ республикэ грантхэр IэпыIэгъух. ЦIыфхэм ягупсэфыныгъэ къэтэгъэгъунэ, щыкIагъэ ямыIэу псэунхэр тэркIэ анахь шъхьаI. Мы Гупчэм щылажьэхэрэм рэзэныгъэ гущыIэхэр афэзгъазэ сшIоигъу. Iофышху зыуж шъуитыр, джаущтэуи лъыжъугъэкIуат, тэри тыкъыжъудеIэщт, — къыIуагъ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.ШIушIэ Гупчэм иIофышIэхэр районхэми макIох. КIэлэцIыкIухэм къащегъэ­жьагъэу нахьыжъхэм анэсыжьэу щыгъы­нэу афэшIу хъущтхэр афащэх. ШIоигъо­ныгъэ зиIэхэр къякIуалIэх, зыфэе пкъы­гъор шъхьадж хихын ылъэкIыщт. «ТеукIытыхьэхэрэри щыIэх, тхьамыкIэу къэлъагъо фэдэу къызщыхъухэрэри къа­хэкIых. Ау аущтэу зэрэщымытыр, зэдэIэпыIэжь нэшанэ мыщ зэрэхэлъыр агурыдгъаIозэ, тащыгушIукIэу тапэгъокIызэ тадэIэпыIэ», — аIо Гупчэм щылажьэ­хэрэм.— БэмышIэу Гупчэм икъэбар зэхэсхыгъ. Сабыйхэм апае щыгъынхэр къэс­штагъэх. ЗэкIэри къабзэх, дэгъух. Сэри IэпыIэгъу сызэрэхъушъущтым сыкIэуп­чIагъ. Мыщ фэдэ гупчэхэр тищыкIагъэх, къин хэфэгъэ цIыфхэр нахь зэфещэх, зэрямызакъор зэхашIэ къысшIошIы, — еIо Гупчэм зыкъыфэзыгъэзэгъэ Татьяна Андрусенкэм.Гупчэр загъэпсыгъэ мы илъэсым нэбгырэ 3000-м ехъумэ IэпыIэгъу афэ­хъу­гъэх. Ахэр: сабыибэ, гъот макIэ зиIэхэр, ыныбжь епхыгъэу зыгъэпсэфыгъом щыIэхэр, зипсауныгъэ пыч фэхъу­гъэхэр, къэкощыжьыгъэхэр, зиунэ стыгъэхэр ыкIи хэушъхьафыкIыгъэ дзэ операцием хэлажьэхэрэм яунагъохэр. Гупчэр загъэпсыгъэр илъэс зыщыхъу­гъэм епхыгъэ Iофтхьабзэм мыщ фэдэ зэфэхьысыжьхэр къыщашIыгъэх. ГуфакIоу щылажьэхэрэм рэзэныгъэ тхылъхэр щаратыжьыгъ. ЦIыфэу бэрэ къяуалIэхэу, щыкIагъэ нахь зиIэхэм шIухьафтынхэр афашIыгъ.КъэIогъэн фае, илъэси 3,5-у куп зэха­хьэр зыщыIэм къыщегъэжьагъэу щыгъын тонни 100 фэдиз аугъоигъ. Ахэр зычIэлъ хэушъхьафыкIыгъэ гъэтIылъыпIэр мэлажьэ. Зэхахьэм хэлэжьагъэхэр ащ рагъэблэгъа­гъэх. Нэбгырэ мини 8-мэ IэпыIэгъу Гупчэр афэхъугъ. Республикэм ирайонхэм дэкIыгъо 20-м ехъу ащыря­Iагъ.ШIу зышIэ зышIоигъохэм щыгъынхэр урамэу Пролетарскэм тет унэу N 97-м рахьылIэшъущт. ЩыкIагъэ зиIэхэри ащ екIолIэшъущтых.Цэй Замир.