Атлетикэ онтэгъумкIэ Урысыем ичемпионат Москва щыкIуагъ. Мыщ къэралыгъом ишъолъыр 52-мэ къарыкIыгъэ хъулъфыгъэхэм ыкIи бзылъфыгъэхэм зыщаушэтыгъ.
Урысыем ихэшыпыкIыгъэ командэ хэхьащтхэм якъыхэхынкIэ зэнэкъокъум мэхьанэшхо иIагъ. Адыгеим мы спорт лъэпкъымкIэ сэнаущыгъэ зыхэлъ спортсменхэр зэриIэхэр турнирым джыри зэ къыгъэшъыпкъэжьыгъ. Республикэм илIыкIохэм медалитф къахьыгъ. Анахь къахэщыгъэр олимпийскэ резервым испорт еджапIэу Инэм дэтым зыщызыгъэсэрэ Яна Сотиевар ары. ЕкIолIэгъуитIум ащ килограмм 223-рэ къыIэтыгъ ыкIи зэфэхьысыжьхэмкIэ дышъэ медалищ къыфагъэшъошагъ. Тиспортсменкэ икъэгъэлъэгъон благъэу зи къекIолIэшъугъэп. Тренерэу Роман Казаковым Янэ зэнэкъокъум фигъэхьазырыгъ.
Сихъу Аслъан ыгъэсэрэ Бзэсэжъ Аслъан килограмм 65-м нэс къэзыщэчыхэрэм якуп хэтыгъ. Тиспортсмен ухьазырыныгъэ дэгъу зэриIэр къыгъэшъыпкъэжьыгъ, хагъэунэфыкIырэ чIыпIитIу къыди- хыгъ.