Iэшъынэ А.
Республикэ Спартакиадэу «Будь здоров!» зыфиIорэр стадионэу «Зэкъошныгъэм» щэкIо. Адыгэ Республикэм IофшIэнымрэ ыкIи социальнэ хэхъоныгъэмрэкIэ и Министерствэ, АР-м физическэ культурэмкIэ ыкIи спортымкIэ и Комитет, общественнэ организациеу «Урысыем ипенсионерхэм я Союз» зыфиIорэм и Адыгэ шъолъыр къутамэ Iофтхьабзэм кIэщакIо фэхъугъэх.
Программэм имурадыр псауныгъэр агъэпытэзэ, социальнэ, творческэ амалхэр агъэфедэхэзэ, зыныбжь хэкIотагъэхэм, сэкъатныгъэ зиIэхэм ящыIэныгъэ нахьышIу ыкIи ягъашIэ нахь кIыхьэ шIыгъэнхэр ары.Зэхахьэр мэфэкI шIыкIэм тетэу къызэIуахыгъ. Спартакиадэм хэлажьэхэрэм шIуфэс гущыIэхэмкIэ закъыфигъэзагъ Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
— Адыгеим и ЛIышъхьэу КъумпIыл Мурат ыцIэкIэ Iофтхьабзэм къекIолIагъэхэм шIуфэс шъосэхы. Лъэпкъ проектэу «Демографием» къыдыхэлъытэгъэ шъолъыр программэу «Тинахьыжъхэр» зыфиIорэм ипшъэрылъхэр гъэцэкIэгъэнхэмкIэ Спартакиадэм амалышIухэр къеты, зыныбжь хэкIотагъэхэм япсауныгъэ агъэпытэным, тицIыфхэм ягъашIэ нахь кIыхьэ хъуным фэIорышIэ. Ар шэпхэшIухэм адиштэу зэрэрагъэкIокIыщтым сицыхьэ телъ, — къыIуагъ Мырзэ Джанбэч.Iофтхьабзэм хэлажьэхэрэр волейболымкIэ, дартсымкIэ, шахматхэмкIэ, есынымкIэ, теннис цIыкIумкIэ зэнэкъокъугъэх. Муниципальнэ образованиехэм якоманди 9 атлетикэ псынкIэмкIэ, футбол цIыкIумкIэ, щэрыонымкIэ, нэмыкI спорт лъэпкъхэмкIэ неущ заушэтыщт. Спартакиадэм хэлэжьэрэ хъулъфыгъэхэм аныбжь илъэс 60-м, бзылъфыгъэхэм — илъэс 55-м ашIокIы.
Программэу «ГъэшIэ кIыхьэр» апэрэ илъэсэп зылажьэрэр, ау джы ар федеральнэ проектышхоу «Унагъом» хагъэхьажьи, ипхырыщын фэгъэзагъэхэми ахагъэхъуагъ. Социальнэ ыкIи псауныгъэр къэухъумэгъэнымкIэ къулыкъухэр арыгъэмэ, джы культурэм, спортым, гъэсэныгъэм афэгъэзагъэхэри чанэу ащ къыхэлэжьэнхэу щыт.Проектэу зигугъу къэтшIырэр 2025 — 2030-рэ илъэсхэм ателъытагъ. Президентэу Владимир Путиным къызэригъэнэфагъэмкIэ, непэ Урысыем щыпсэухэрэм гурытымкIэ илъэс 73-рэ фэдиз къагъашIэмэ, 2030-рэ илъэсым ехъулIэу а къэгъэлъэгъоныр илъэс 78-м нэсын, нэужым илъэс 80-м шIокIын фае.Программэу «ГъэшIэ кIыхьэр ыкIи чаныр» зыфиIорэм районхэр чанэу хэлажьэх. Ахэм ялIыкIохэм ащыщхэм гущыIэгъу тафэхъугъ.
Хьакурынэхьаблэ къикIыгъэ Бислъангъур Марет илъэсищ хъугъэу Iофтхьабзэм зыщеушэты.— Шэуджэн районым икуп илъэс къэс Спартакиадэм чанэу хэлажьэ. Анахьыжъэу Къуижъ Риммэ илъэс 70-рэ ыныбжь, Исуп Абдул илъэс 65-рэ, ар командэм ипащ. БлэкIыгъэ илъэсым волейболымкIэ, есынымкIэ апэрэ чIыпIэр къэтхьыгъ, мыгъэ а къэгъэлъэгъоным едгъэхъун гухэлъ тиI, — къыIуагъ Бислъангъур Марет.— Мыекъопэ районым икуп сыхэт, илъэс 67-рэ сыныбжь. Унэм сисыныр къин къысщэхъу. Мы программэр зыщыIэм къыщегъэжьагъэу лъэшэу сикIасэу сыхэлажьэ. ЦIыфхэм сахэтыныр, спортыр, тхылъеджэныр сыгу рехьых. Анахь шъхьаIэу къыхэзгъэщымэ сшIоигъор жъыгъом уимыгъэщтэным, гукъаом узэлъиштэу унэм уимысыным афэшI мыщ фэдэ зэхахьэхэм мэхьанэшхо зэряIэр, — къыIуагъ Абрэдж Светланэ.Неущ Iофтхьабзэм изэфэхьысыжьхэр ашIыщтых, текIоныгъэр къыдэзыхыгъэхэр, анахь чанэу зыкъэзыгъэлъэгъуагъэхэр къыхагъэщыщтых.ЛъэпшъыкъоФатим.