Лъэпкъ тхылъеджапIэр
Адыгэ Республикэм и Лъэпкъ тхылъеджапIэ зэхахьэ «Обыкновенное чудо Евгения Шварца» ыIоу щыIагъ. Ар Урысые проектэу «Книжный поезд» («Тхылъ мэшIоку») зыфиIорэм къыдыхэлъытагъэу кIуагъэ. Мыщ Санкт-Петербург, Москва, Нижний Новгород, Казань, Ульяновск, Волгоград, Шъачэ зэфищагъэх.
Ау Iофтхьабзэм къызэлъиубытыгъэр бэкIэ нахьыб, мэфэкI иным Урысыем ишъолъыр 50-м ехъу хэлэжьагъ.Темэ шъхьаIэу иIагъэр «Литературнэ зыкIыныгъэм игъогу: тхылъхэр, тхакIохэр, цIыф лъэпкъхэр ыкIи урысыбзэр». Проектыр Урысыем щыпсэурэ лъэпкъхэм языкIыныгъэ и Илъэс, джащ фэдэу Владимир Даль къызыхъугъэр илъэс 225-рэ ыкIи Михаил Салтыков-Щедриныр илъэс 200 зэрэхъурэм афэгъэхьыгъагъ.Проект иным ипрограммэ литературнэ хъугъэ-шIэгъэ 300-м нахьыбэ къызэлъаубыты, ахэр зэфэдэкIэ урысые библиотечнэ-къыдэгъэкIэкIо фестивалэу «Книжные маяки России» зыфиIорэм изы Iахь. Мыр апэрэу 2023-рэ илъэсым Санкт-Петербург щыкIуагъ.«Книжные маяки России» зыфиIорэр Урысыем ишъолъырхэм ащыпсэухэрэм тхылъ къыдэгъэкIынымкIэ зэхащэрэ фестиваль, ащкIэ еджэныр ыкIи тхылъ культурэр цIыфхэм нахь арагъашIэ, апэблагъэ ашIы. Проект иныр пхырыщыгъэнымкIэ культурнэ IофыгъохэмкIэ Президентым ифонд иIэпыIэгъу къызфагъэфедэ. Iофтхьабзэм изэхэщэнкIэ зэIухыгъэ Iахьзэхэлъ обществэу «Урысые мэшIоку гъогухэр» ыкIи общественнэ организациеу «Урысыем итхакIохэм я Союз» яшIуагъэ къэкIуагъ.Лъэпкъ тхылъеджапIэм щыкIогъэ литературнэ мэфэкIым Адыгэ къэралыгъо университетым филологиемкIэ, тарихъымкIэ ифакультетхэм ястудентхэр, Адыгэ кIэлэегъэджэ колледжэу Андырхъое Хъусен ыцIэ зыхьырэм щеджэхэрэр хэлэжьагъэх. ХьакIэхэм апаекIэ литературнэ къэгъэлъэгъонэу зэхащэгъагъэм Е. Л. Шварц ищыIэныгъэ ыкIи итворчествэ афэгъэхьыгъэ тхылъхэр, ежь тхакIом ытхыгъэхэм ащыщхэр хэлъыгъэх.Къызэхэхьагъэхэр Е. Л. Шварц зыфэдэгъэ цIыфыр, МыекъуапэкIэ тхакIом мэхьанэу иIагъэр, ежь тхакIом тикъалэ лъэшэу зэрикIэсагъэр къэгъэлъэгъонымкIэ ыкIи электроннэ лъэтегъэуцомкIэ арагъэшIагъ.КъекIолIагъэхэм апашъхьэ «Шварц и Унэ» ипащэу Наталья Суховаяр къыщыгущыIагъ. Ащ музеир зэхэщагъэ зэрэхъугъэр ыкIи гъэсэныгъэ Iофышхо зэрилэжьырэр къыIуагъ. 2020-рэ илъэсым чъэпыогъум къыщегъэжьагъэу волонтер проектэу тхакIом имемориальнэ музейрэ икультурнэ гупчэрэ Мыекъуапэ зэрэщылажьэхэрэр къыIотагъ. Проектым ипащэр Евгений Шварц ипхъорэлъфэу Мария Крыжановскаяр ары. 2025-рэ илъэсым мэкъуогъум «Шварц и Ун» зыфиIорэ музеир къызэIуахыгъэу зэрэлажьэрэр, зэрэцIыф кIуапIэр ащ кIигъэтхъыгъ.Зигъо Iофтхьабзэм Адыгэ къэралыгъо университетым итеатральнэ студие иартистхэр (художественнэ пащэр Абхъаз Республикэм изаслуженнэ артистэу Исуп Тимур) тхэкIошхом ипьесэхэу «Дракон», «Голый король» ыкIи «Тень» къахэхыгъэ пычыгъохэм къяджагъэх.Мамырыкъо Нуриет.