Iэшъынэ А.
Iоныгъом и 1-м къыщегъэжьагъэу Мыекъопэ индустриальнэ техникумым цIыф зэрымыс быбырэ пкъыгъохэм ягъэзекIон епхыгъэу Iоф зышIэщтхэм ягъэхьазырын щаублагъ.
КъыдэгъэкIын ыкIи инновационнэ IофшIэнымкIэ техникумым ипащэ игуадзэу Валерий Габдрафиковым къызэриIуагъэмкIэ, мы сэнэхьатым нэбгырэ 25-рэ илъэси 3-рэ мэзи 10-рэ феджэщтых. ЦIыф зэрымыс быбырэ пкъыгъохэм ягъэзекIонкIэ гурыт сэнэхьат яIэу ахэр къычIэкIыщтых.— Мы лъэныкъомкIэ гъэсэныгъэ ядгъэгъотын амал тиIэ зэрэхъугъэм мэхьанэшхо иIэу сэлъытэ, сыда пIомэ цIыф зэрымыс быбырэ пкъыгъохэр тищыIэныгъэ щыщ хъугъэх. Нэбгырэ 25-у тштагъэр бюджет шIыкIэм тетэу еджэщтых. Ахэм ушэтын атын ищыкIэгъагъэп, аттестатхэмкIэ анахь шIэныгъэ дэгъу зиIэхэр пхырыкIыгъэх. Апэрэ илъэсым яегъэджэн нэмыкIхэм зыкIи атекIыщтэп, ау ятIонэрэ курсым къыщегъэжьагъэу сэнэхьатым нахь нэIуасэ фэтшIыщтых, цIыф зэрымыс быбырэ пкъыгъохэр зыфэдэхэр, ахэр зэрэзэтекIыхэрэр, зэрэбгъэфедэщтхэр, зэрэпшIыжьыщтхэр ыкIи нэмыкIхэр игъэкIотыгъэу ядгъэшIэщтых. Лекциехэм анэмыкIэу практическэ IофшIэнхэр бэу къыхэдгъэхьанхэу тэгъэнафэ, — еIо тигущыIэгъу.ЫпэкIэ мыщ фэдэ сэнэхьат Мыекъопэ индустриальнэ техникумым зэримыIагъэм къыхэкIыкIэ, ащ фытегъэпсыхьэгъэ Iэмэ-псымэ IэкIэлъэп. Ау республикэ бюджетым къыхэхыгъэ мылъкумкIэ ахэр къафащэнхэу аублагъ.— КъэкIорэ илъэс еджэгъум нэс тищыкIагъэр зэкIэ зэдгъэгъотынэу, практическэ IофшIэнхэм тафэхьазырынэу тэгъэнафэ. СэнэхьатыкIэу къыхэхьагъэм фезыгъэджэщтхэри тиI. ОБЖ-мкIэ кIэлэегъаджэу Александр Денейкиныр ыпэкIэ летчикыгъ, мы лъэныкъом дэгъоу хешIыкIы. Ар кураторэу дгъэнэфагъ. Мыекъопэ къэралыгъо технологическэ университетым икIэлэегъаджэхэм ащыщхэри къэкIонхэу зэзэгъыныгъэ адэтшIыгъ. Джащ фэдэу Дзэ егъэджэн гупчэм зэпхыныгъэ дытиIэу студентхэр тэщэх, — еIо пащэм игуадзэ.ЦIыф зэрымыс быбырэ пкъыгъохэр дзэ къулыкъу закъор арэп зыщагъэфедэхэрэр, псэолъэшIынымкIи, мэкъу-мэщымкIи, псауныгъэр къэухъумэгъэнымкIи, аэросурэттехынымкIи, чIыпIэр мониторинг шIыгъэнымкIи, геодезическэ IофшIэнхэр зэхэщэгъэнхэмкIи, лъыхъон-къэгъэнэжьынымкIи ахэм яшIуагъэ къэкIон ылъэкIыщт. Ащ ишыхьат мы илъэсым ипэублэ осышхоу къесыгъэм къыздихьыгъэ гумэкIыгъохэр дэгъэзыжьыгъэнхэмкIэ БПЛА-хэр зэрагъэфедагъэхэр.Студентхэм ащыщхэм гущыIэгъу тафэхъугъ. Анатолий Лашкиным мыщ фэдэ гурыт сэнэхьат зэригъэгъотын амал иIэ зэрэхъугъэм рэгушхо. Лъэныкъо зэфэшъхьафхэмкIэ бгъэфедэн плъэкIыщт цIыф зэрымыс быбырэ пкъыгъор зэрэбгъэзекIощтыр зэригъашIэмэ, IофшIэпIэ чIыпIэ дэгъу ыгъотынэу елъытэ.Данил Басовым ицIыкIугъом къыщегъэжьагъэу быбырэ джэгуалъэхэр ыгъэзекIонхэр ыгу рехьы. Ащ епхыгъэ сэнэхьат зэригъэгъотынэу Мыекъопэ индустриальнэ техникумыр къыхихыгъ.Шъугу къэдгъэкIыжьын къулыкъу зыхьыщт ныбжьыкIэхэм джыри зы амалыкIэ яIэ зэрэхъугъэр. Ар цIыф зэрымыс быбырэ пкъыгъохэм ясистемэхэм яподразделениякIэу агъэпсырэм зэзэгъыныгъэкIэ къулыкъур щахьын зэралъэкIыщтыр ары. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28. Джащ фэдэу шъузщыпсэурэ чIыпIэм щыIэ дзэ комиссариатым зыфэжъугъазэмэ, шъуищыкIэгъэ къэбарыр ежъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбар ижъугъотэщт.ДЕЛЭКЪО Анет.