Санитар-эпидемиологие шапхъэхэр зэриукъуагъэхэмкIэ, ащ къыхэкIэу цIыфыбэ хьылъэу зэрэсымэджагъэмкIэ Мыекъуапэ щыщ унэе сатыушIыр агъэмысэ.
Мыекъопэ къэлэ хьыкумым унэе сатыушIым фэгъэхьыгъэ уголовнэ Iофэу къызэIухыгъэмкIэ унашъо ышIыгъ. УФ-м и УК ия 236-рэ статья иа 1-рэ Iахь (санитар-эпидемиологие шапхъэхэр зэриукъуагъэхэм, ащ къыхэкIэу цIыфыбэ зэрэсымэджагъэм афэшI) рыгъуазэхэзэ ар мысэу алъытагъ.Хьыкумым зэригъэунэфыгъэмкIэ, 2025-рэ илъэсым ибэдзэогъу мазэ и 4-м къыщыублагъэу и 7-м нэс Мыекъуапэ дэт ресторанмэ ащыщым щышхагъэхэм кIэтIый уз хьылъэ яIэ хъугъагъэ, къызэрэчIэщыжьыгъэмкIэ, ахэм зэкIэми гъомылапхъэу апагъохыгъэхэр къэбзэныгъэ шапхъэхэм адиштэщтыгъэхэп. Нэбгырэ 63-мэ медицинэ IэпыIэгъу ящыкIэгъагъ, ахэм ащыщ нэбгырэ 19-р сабыих.Санитар шапхъэхэм зэрарыгъуазэхэрэр зауплъэкIум, шхыныгъохэр зыщызэрахьэрэ шхапIэм гъомылапхъэхэр тэрэзэу ыкIи пIалъэм диштэу зэрэщамыIыгъыгъэхэр, агъэхьазырыгъэ шхыныгъохэм икъу фэдизэу зэралъымыплъэжьыщтыгъэхэр къэнэфагъ.Мысагъэ афэзылъэгъурэ къэралыгъо къулыкъушIэр хьыкумым къыращэлIагъэм лажьэ зэриIэр къыушыхьатыгъ, ау лажьэр зыфалъэгъурэм зиягъэ зэригъэкIыгъэмэ язэрар зэрафипщыныжьыгъэр хьыкумым къыдилъыти, унашъо ышIыгъ: агъэмысагъэм общественнэ шхыныгъохэм япхыгъэ IофшIэнхэр зы илъэсрэ мэзи 6-рэ ышIэнхэ фитыщтэп.