Фитыныгъэ имыIэу мототехникэр зыгъэIорышIэрэмэ якъыхэгъэщын епхыгъэ Iофтхьабзэ Мыекъопэ районым иполицейскэхэм рагъэкIокIыгъ.
Гъогумэ атехъухьэрэ хъугъэ-шIагъэмэ шъобжхэр ахамыхыным фытегъэпсыхьэгъэ пэшIорыгъэшъ Iофтхьабзэр Мыекъопэ районым и Къэралыгъо автоинспекцие ригъэкIокIы зэхъум, полицием иучастковэ уполномоченнэхэр, зыныбжь имыкъугъэхэм яIофхэмкIэ инспекторхэр игъусагъэх. Мототехникэр зыгъэIорышIэрэмэ ащ фэдэ фитыныгъэ къязытырэ водительскэ удостоверениехэр яIэхэу щытмэ ауплъэкIугъ. Анахьэу анаIэ зытырадзагъэр мотоциклэхэр, питбайкхэр, мопедхэр ыкIи скутерхэр зыгъэIорышIэрэ зыныбжь имыкъугъэхэр ары.Гъогум къыщагъэуцугъэ ныбжьыкIэмэ ухъумэкIо къулыкъушIэхэр адэгущыIагъэх, щынэгъончъэнымкIэ шапхъэу щыIэхэр къафаIотагъ, агу къагъэкIыжьыгъ шъобжхэм ащызыухъумэхэрэ хэушъхьафыкIыгъэ пкъыгъохэр зэрагъэгъотымэ зэрэнахьышIур, джащ фэдэу шапхъэхэр зэрыт тхылъ цIыкIухэр аратыгъэх.Шъхьафэу водитель ныбжьыкIэмэ ялIыкIомэ Iоф адашIагъ — ны-тымэ хэбзэгъэуцугъэр аукъомэ, ащ къыкIэлъыкIощтыр зэрытхэгъэ тхьапэхэр афагощыгъэх ыкIи водительскэ удостоверение зимыIэ ныбжьыкIэхэм транспортыр ратымэ, пшъэдэкIыжьэу ахьыщтыр зыфэдэр агу къагъэкIыжьыгъ.Къэралыгъо автоинспекциер ны-тымэ теубытагъэ хэлъэу къяджэ якIалэмэ языгъэпсэфыгъо уахътэ зэрэкIорэм анаIэ тырагъэтынэу ыкIи водительскэ удостоверениер ахэм къыдахыфэ мототехникэр агъэIорышIэнэу арамытынэу.