Е. Сергеев
Илъэс къэс гъэфэбэгъу уахътэр къемыжьэзэ псэупIэ-коммунальнэ хъызмэтым епхыгъэ псэуалъэхэр ауплъэкIух, зищыкIагъэхэр агъэцэкIэжьых е зэблахъух. Ахэм яIофшIэн кIымафэм къызэтемыуцоным игъэкIотыгъэу Адыгеим щыдэлажьэх.
Мы уахътэм ехъулIэу IофшIэнхэр зэрэрекIокIыхэрэр ыкIи а псэуалъэхэр зэрэхьазырхэр «Адыгэ макъэм» къыфиIотагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ энергиер къэухъумэгъэнымкIэ ыкIи федэ къегъэхьыгъэнымкIэ иотдел ипащэу Хъымыщ Тимур.2026 — 2027-рэ илъэсхэм ябжыхьэ-кIымэфэ лъэхъан псэупIэ-коммунальнэ хъызмэтыр ыкIи социальнэ псэуалъэхэр зэрэфагъэхьазырыщтхэм епхыгъэ унашъоу АР-м иминистрэхэм я Кабинет ыштагъэм тетэу тызхэт илъэсым ижъоныгъокIэ мазэ къыщегъэжьагъэу IофшIэнхэр аублагъэх. Республикэм имуниципальнэ псэупIэ пстэури ащ ыуж ит, агъэнэфэгъэ пIалъэхэм диштэу IофшIэнхэр лъэкIуатэх, пстэумкIи сомэ миллиони 115-рэ фэдиз ахэм апэIухьащт.
ТигущыIэгъу къызэриIуагъэмкIэ, шапхъэхэм къазэращыдэлъытагъэу, кIымафэр икIи, фабэр къатын имыщыкIэгъэжь зэхъум, муниципальнэ образование пэпчъ ипсэупIэ-коммунальнэ хъызмэт епхыгъэ псэуалъэхэм язытет зэригъэшIагъ, ащ къыгъэлъэгъуагъэхэм къапкъырыкIхэзэ гъэцэкIэжьын IофшIэнэу зэшIуахын фаехэр къызэхигъэуцуагъ, нэужым республикэм зэрэщытэу щашIэщтыр агъэнэфагъ.— ЗэкIэмкIи котельнэ 260-рэ, фабэм ирыкIуапIэу километрэ 288-рэ, фабэр къэзытырэ пунктэу 25-рэ, гъэстыныпхъэ шхъуантIэм икIуапIэу километрэ 4500-м ехъу, псырыкIуапIэу километрэ 2700-м нахьыбэ, фэтэрыбэу зэхэт унэ 2000 фэдиз къихьащт бжыхьэ-кIымэфэ уахътэм фэгъэхьазырыгъэнэу рахъухьагъ. Джащ фэдэу пхъэ кубометрэ 275-рэ, шIомыкI тонн 230-рэ ащ фэдэ гъэстыныпхъэ зищыкIэгъэ гъэфэбапIэхэм аIэкIэгъэхьэгъэн фае, — къыIуагъ Хъымыщ Тимур.Муниципальнэ образованиехэм зэкIэми IофшIэнхэр ащырагъэжьагъэх. ПIалъэхэм адиштэу ахэр лъагъэкIуатэх. Непэрэ мафэм ехъулIэу гъэфэбэгъу уахътэу къэблагъэрэм республикэм ипсэупIэ-коммунальнэ хъызмэт ипсэуалъэхэр процент 90-у фэхьазырых. Къэнэгъэ IофшIэнхэр чъэпыогъум и 1-м нэс аухынхэ фае. ЕтIанэ Ростехнадзорым ыкIи АР-м и ПсэупIэ инспекцие ялIыкIохэм ахэр ауплъэкIущтых, зыпари щыкIагъэ къахамыгъэщымэ, унэхэм ягъэфэбэн зэрэфэхьазырхэр къэзыушыхьатырэ тхылъхэр къаратыщтых.Министерствэм илIыкIо къызэриIуагъэмкIэ, зэрэхьазырхэр зэрагъэунэфырэ шапхъэхэм блэкIыгъэ илъэсым зэхъокIыныгъэхэр афэхъугъэх. Джы фабэр къэзытырэ организацие пэпчъ Iофтхьабзэу зэшIуихын фаехэр гъэнэфагъэх, бжыхьэ-кIымэфэ уахътэм зэрэфэхьазырыр индексхэмкIэ къыгъэлъэгъон фае.ПсэупIэ-коммунальнэ хъызмэтым епхыгъэ IофшIэнэу республикэм щызэшIуахырэр зэкIэ фабэр, псы къабзэр, гъэстыныпхъэ шхъуантIэр, электроэнергиер унэхэм икъоу аIэкIэхьанхэм, цIыфхэм Iэрыфэгъу щыIакIэ яIэным афытегъэпсыхьагъэх.IЭШЪЫНЭ Сусан.