Е. Абакумовам ихъарзынэщ
«Адыгеим исурэтышIхэр» зыфиIорэ къэгъэлъэгъоныр къалэу Владикавказ къыщызэIуахыгъ. IэпэIэсэ 23-мэ яIофшIэгъэ 60 фэдиз Iофтхьабзэм хэхьагъ.
Живописым, графикэм, скульптурэм ыкIи нэмыкI жанрэхэм арылъ IофшIагъэхэр хьалэмэтэу гъэпсыгъэх.Искусствэ лъагэм хэшIыкI фызиIэхэм къэгъэлъэгъоным ифэшъошэ уасэ фашIыгъ. Ащ икъызэIухын хэлэжьагъэх Темыр Осетием и Правительствэ итхьаматэ игуадзэу Александр Реутовыр, Осетием культурэмкIэ иминистрэу Батраз Гудиевыр, республикэм исурэтышI цIэрыIохэм ащыщхэр ыкIи искусствэр зышIогъэшIэгъон хьакIэхэр.АР-м исурэтышIхэм я Союз итхьаматэу Елена Абакумовам къэгъэлъэгъоныр зэрагъэпсыгъэм тыщигъэгъозагъ.— Адыгеим исурэтышIхэм я Союз илIыкIо купэу Iофтхьабзэм кIуагъэхэм лъэшэу фабэу къытпэгъокIыгъэх. Осетием икъушъхьэхэм къащыублагъэу лъэпкъ шэн-хабзэхэм анэсыжьэу къытагъэлъэгъугъ. Искусствэр щыIэныгъэм зэриIотакIор тисурэтышIхэм къаушыхьатыгъ. Лъэныкъуабэ къызэлъызыубытырэ къэгъэлъэгъоным нахьыжъ сурэтышIэу къытхэмытыжьхэми ныбжьыкIэу зыцIэ мыIугъэхэми яIэшIагъэхэр хэдгъэхьагъэх. РеспубликитIум тызэдэлэжьэнымкIэ зишIуагъэ къытэкIыгъэр Урысыем исурэтышIхэм я Союз ары. ТапэкIи мыщ фэдэ творческэ зэхъожьхэр тиIэным тыщэгугъы, — къыIуагъ Елена Абакумовам.АР-м исурэтышIхэм яIофшIагъэхэм Адыгеим идэхагъэрэ ибжьышIуагъэрэ къырагъэлъэгъукIы. Я XX — XXI-рэ лIэшIэгъухэм лэжьэгъэ IэпэIасэхэм ятворчествэ зэрэбаир, зэрэзэтефыгъэр IэшIагъэмэ къагъэлъагъо. СурэтышIхэр гуфит-шъхьафитэу зэрэгупшысэхэрэр яIэшIагъэхэм апхырыщыгъ. Дунаим идэхагъэ зыфагъазэзэ, сурэтым къыщаIотэщтыр къыхахыгъ.Къэгъэлъэгъоныр Владикавказдэт къэгъэлъэгъуапIэу «РСО-Алания» зыфиIорэм Iоныгъом и 30-м нэс щызэIухыгъэщт.Лъэпшъыкъо Фатим.