Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэм Мыекъуапэ щыщ спортсменым ныбжьыкIэхэм азыфагу пэрытныгъэр щиубытыгъ.
Iофтхьабзэм икIэух я 7-рэ едзыгъо Чэчэн Республикэм икъэлэ шъхьаIэу Грознэм щыкIуагъ. Спортсменхэм километри 149,5-рэ хъурэ гъогууанэр къызэранэкIыгъ. Зэнэкъокъур зыщырагъэжьагъэр ыкIи зыщаухыжьыгъэр проспектэу Владимир Путиным ыцIэ зыхьырэр ары. Мыщ текIоныгъэр къыщыдихыгъ Москва илIыкIоу Георгий Бортниковым.Ау генеральнэ классификацием пэрытныгъэр щызыубытыгъэр Бортниковыр арэп, едзыгъуи 7-м язэфэхьысыжьхэмкIэ командэу «Мангазея — Московскэ спорт» зыфиIорэм хэт Михаил Фокиныр зэкIэми анахь лъэшыгъ. Километрэ 802,5-рэ хъурэ гъогууанэр сыхьат 17-рэ такъикъ 55-кIэ ащ къычъыгъ. Ащ тIэкIу дэдэкIэ ыуж къинагъ ятIонэрэ чIыпIэр къыдэзыхыгъэ Савва Новиковыр. Илья Садыковыр ящэнэрэ хъугъэ. ХагъэунэфыкIырэ чIыпIэхэр къэзыхьыгъэхэр зэкIэ Москва илIыкIох.— Зэнэкъокъур зэрифэшъуашэу зэрэзэхащагъэр къыхэзгъэщымэ сшIоигъу. Апэрэ чIыпIэр къызэрэдэсхыгъэр лъэшэу сигуапэ, мы текIоныгъэр тикомандэ хэтхэм зэдыряй. Савва Новиковым, тиспортсменхэм сафэраз, — къыIуагъ Михаил Фокиным.
Очко пчъагъэу къахьыгъэмкIэ зэфэхьысыжьхэр пштэмэ, мыщ пэрытныгъэр щиубытыгъ Георгий Сергеевым. Къушъхьэ чIыпIэхэм анахь дэгъоу закъыщызгъэлъэгъуагъэр Сергей Новиковыр ары. Нахьыжъхэм язэнэкъокъу дакIоу зыныбжь илъэс 19-м нэмысыгъэхэми заушэтыгъ. Тигуапэу къыхэтэгъэщы Мыекъуапэ испортсменэу Вадим Ларичевым мы лъэныкъом текIоныгъэр къызэрэщыдихыгъэр. Ларичевыр ятIонэрэ чIыпIэр зыубытыгъэ Тюменскэ хэкум илIыкIо такъикъ 14-м ехъукIэ ыпэ ишъыгъ.Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэр 1993-рэ илъэсым Мыекъуапэ щырагъэжьагъ, илъэс къэс бжыхьэм рагъэкIокIы.КъэкIощт илъэсым юбилейнэ я 35-рэ зэнэкъокъур зэхащэщт. Ар нахь гъэшIэгъон зэрашIыщтыр ыкIи зызэрэрагъэушъомбгъущтыр къыхигъэщыгъ Урысыем кушъхьэфэчъэ спортымкIэ и Федерацие ивице-президентэу Ренат Хамидулиным.— Iофтхьабзэр дэгъу дэдэу рекIокIыгъ. Къызэдэчъэныр шъолъыритфымэ ащыкIуагъ, едзыгъо пэпчъ зэрифэшъуашэу зэхэщэгъэным бысымхэр пылъыгъэх, алъэкI къагъэнагъэп, — къыIуагъ Ренат Хамидулиным.