ЯшIэныгъэхэм осэшхо къафашIыгъ

Сэнэхьат ухьазырыны­гъэмкIэ шъолъыр программэу «Адыгеим и ЛIыхъужъхэр» зыфи­Iо­рэм ипхырыщын аухыгъ ыкIи ащ хэлэжьагъэхэм къалэжьыгъэ дипломхэр мэфэкI шIыкIэм тетэу аратыжьыгъ. Программэм фэгъэзэгъагъэхэм ыкIи хэлэжьагъэхэм ащыщхэм «Адыгэ ма­къэр» аIукIагъ.

ХэушъхьафыкIыгъэ дзэ операцием хэлажьэхэрэмрэ иветеранхэмрэ «Къэралыгъо, муниципальнэ гъэIорышIэныр» зыфиIорэ лъэныкъомкIэ сэнэхьат гъэсэныгъэ арагъэгъотыным программэр тегъэпсыхьэгъагъ. Къыхахыгъэ апэрэ купэу ветеран нэбгырэ 18 хъурэм едзыгъуиплI хъущтыгъэ еджэныр къызэранэкIыгъ.Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм ипхырыщын фэгъэзагъэу, чIыпIэ зыгъэIорышIэжьын къулыкъухэм адэлэжьэгъэнымкIэ Комитетым итхьаматэу КIэдыкIое Руслъан къызэриIуагъэмкIэ, икIыгъэ илъэсым шышъхьэIум и 25-м къыщегъэ­жьагъэу 2026-рэ илъэсым ащ фэдэ иуахътэ нэс программэр агъэцэкIагъ.— Шъугу къэзгъэкIыжьын, УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахът» зыфиIорэм тегъэ­псыкIыгъэу АР-м и ЛIышъхьэу КъумпIыл Мурат иунашъокIэ шъолъыр программэу «Адыгеим и ЛIыхъужъхэр» зыфиIорэм ипхы­рыщын икIыгъэ илъэсым тыфежьагъ. Илъэсым къыкIоцI программэм хэлэжьагъэхэм къэралыгъо, муниципальнэ гъэ­IорышIэнымкIэ къулаиныгъэ гъэнэфагъэхэр аIэ къырагъэхьагъэх, тиреспубликэ иэкономикэ илъэныкъо шъхьаIэхэм янэша­нэ­хэм защагъэгъозагъ. Пшъэ­ры­лъэу тиIагъэхэм ащыщ еджэныр къэзыухыхэрэм ащыщхэм республикэм игъэцэкIэкIо хабзэ ыкIи чIыпIэ зыгъэIоры­шIэжьын къулыкъухэм IофшIапIэ къащы­фэдгъотыныр. Нэбгыри 4-мэ IофшIэныр рагъэ­жьэгъах, 10-р — джыри дзэкъулыкъушIэх, къэнагъэхэм IофшIэпIэ чIыпIэ тафылъэхъу, — къыхигъэщыгъ КIэдыкIое Руслъан.Шъолъыр Гупчэу Мыекъопэ къэралыгъо технологическэ университетым щагъэпсыгъэр ары егъэджэн программэм фэгъэзэгъагъэр. Ащ ипащэу Паф Фатимэ программэм зэфэхьысыжьхэр къыфишIыгъ.— ТиеджакIохэм лъэшэу тарэгушхо, тызэращыгугъыгъэу шIэныгъэ дэгъухэр къагъэлъэгъуагъ. Программэм къыдыхэлъытэгъэгъэ едзыгъуиплIыри, ахэм азыфагу къыдэфэрэ стажировкэхэри зэрифэшъуашэу тилIыхъужъхэм акIугъ. Ушэтынхэр дэгъу дэдэу ветеран 16-мэ атыгъ, квалификационнэ Iоф­шIэнри зэкIэми дэгъоу къагъэшъыпкъэжьын алъэкIыгъ. Ащ ишыхьат тишъо­лъыр программэ хэлэжьагъэхэм яшIэныгъэхэм УФ-м и Президент и Аппарат, РАНХиГС-м ипрофессорхэм осэ ин къазэрафашIыгъэр, — хи­гъэунэфыкIыгъ Паф Фатимэ.Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэ­лэжьагъэхэм ащыщ Сергей Старусь. Ар Урысыем иуголовнэ-гъэцэкIэкIо къулыкъу и Гъэ­IорышIапIэу АР-м щыIэм иIофышI, хэгъэгу кIоцI къулыкъум имайор.— Илъэс псаум программэм анахь шъхьаIэу тигъэшIагъэр зэхэубытэгъэ еплъыкIэу пащэм иIэн фаер зыфэдэр ары. Лекциехэм тядэIугъэ къодыеп, ми­нис­трэхэр, къулыкъу зэфэ­шъхьаф­хэм япащэхэр яIэпэIэсэныгъэкIэ къыддэгощагъэх, — къыIуагъ ветераным.Программэм хэлэжьагъэхэм ащыщ хэушъхьафыкIыгъэ дзэ операцием иветеранэу Александр Махневыр. Ащ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт игъэсэкIо шъхьаIэу иIэпэIэсэныгъэ джырэ нэс хигъэхъуагъ. Джы ветераным къэралыгъо IофшIэн ыгъо­тыгъ, ар Мыекъопэ къэлэ администрацием ипащэ хэушъхьафыкIыгъэ дзэ операцием иIофыгъохэмкIэ иIэпыIэгъоу агъэ­нэфагъ.— Сэнэхьат ухьазырыны­гъэмкIэ программэу тызхэлэ­жьагъэм ишIуагъэкIэ гъэцэкIэкIо хэбзэ къулыкъухэм яIофшIэн ыкIи япшъэрылъхэр зэдгъэшIэнхэ тлъэкIыгъ. АщкIэ ти­гъэсакIохэм мэхьанэшхо яIагъ, амалыкIэхэр, шIэныгъэ дэгъухэр тагъэгъотыгъ. Джы ахэр IофшIэным къыщысэ­шъхьапэх, — къыхигъэщыгъ Александр Махневым.Республикэм ипащэ еджэныр къэзыухыгъэхэм мэфэкI шIыкIэм тетэу афэгушIуагъ, дипломхэр аритыжьыгъ.— ШъуиIофшIэнкIэ осэ шъхьа­Iэу щытын фаер Адыгеим щы­псэухэрэм цыхьэ къышъуфа­шIыныр ары. Псауныгъэ пытэ шъуиIэнэу, Iофэу ешъухьыжьэрэ пстэуми гъэхъагъэхэр ащышъу­шIынэу, Адыгеимрэ Урысыемрэ нахь зэтегъэпсыхьагъэ хъунхэм шъуишъыпкъэу шъудэлэжьэнэу сышъуфэлъаIо, — къыщиIуагъ АР-м и ЛIышъхьэу КъумпIыл Мурат зыщафэгушIогъэхэ Iоф­тхьабзэм.Тишъолъыр тапэкIэ хэхъоныгъэ ышIынымкIэ ыкIи зисэнэхьаткIэ IэпэIэсэныгъэ зы­хэлъ цIыфхэр гъэхьазырыгъэнхэмкIэ мы программэм мэхьанэшхо иI.IЭШЪЫНЭ Сусан.