Хьэлъэкъуае щыщ илъэс 52-рэ зыныбжь Бэшкэкъо Фатимэ иуголовнэ IофкIэ Теуцожь район хьыкумым кIэух унашъоу ышIыгъэр къэнэфагъ.
Урысыем и Уголовнэ кодекс ия 159.2-рэ статья ия 3-рэ Iахь зигугъу къышIырэ бзэджэшIагъэр зэрихьагъэкIэ (ахъщэшхо гъэпцIагъэкIэ къызIэкIигъэхьагъэкIэ) ар агъэмысагъ.Дэеу зэрэзэхихырэр, ящэнэрэ купым хэхьэрэ сэкъатныгъэ зэриIэр къэзыгъэлъэгъорэ документ нэпцIхэр Ф. Хь. Бэшкэкъом Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ икъутамэ IэкIигъэхьагъэх. Сомэ мин 500-м ехъурэ страховой пенсиер бзылъфыгъэм исчет рагъэхьанымкIэ ахэр лъапсэ хъугъэх.Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ зэхищэгъэ уплъэкIунхэм якIэуххэм атетэу уголовнэ Iофыр къызэIуихыгъ ыкIи зэхифыгъ Адыгэ Республикэм хэгъэгу кIоцI IофхэмкIэ и Министерствэ.Теуцожь район хьыкумым бзэджэшIагъэ зезыхьэгъэ Ф. Хь. Бэшкэкъом сомэ мини 100 тазырэу тырилъхьагъ. Адыгэ Республикэм и Прокуратурэ идаоу сомэ мин 500-м ехъурэ чIэнагъэу Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ икъутамэ ышIыгъэр Ф. Хь. Бэшкэкъом къыIыхыжьыгъэным фэгъэхьыгъэр зэшIохыгъэ хъугъэ.